އޭޑީކޭ އިން ކޮވިޑަށް ޓެސްޓްކުރަނީ ސަރުކާރުން އަގު ދައްކާ ގޮތަށް ކަމަށްވާއިރު، އެ ހޮސްޕިޓަލުގައި މި ބައްޔަށް ޓެސްޓު ކުރުމުގެ މަސައްކަތް ފަށާފައިވަނީ މިދިޔަ އާދީއްތަ ދުވަހުއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވީ އޭޑީކޭ އަށް ފައިސާ ދައްކަނީ ސަރުކާރުން ކަމަށްވީ ނަމަވެސް އެ ފައިސާ ދައްކަނީ ރައްޔިތުންގެ ޓެކްސް ފައިސާ އިން ކަމަށްވާތީ އެކަމުގައި ހިނގާ ހަރަދުތައް ބަލަން ބޭނުންވާތީ ފިނޭންސް މިނިސްޓްރީ މެދުވެރިކޮށް އެ މައުލޫމާތު ހޯދާފައިވާ ކަމަށެވެ.
އެގޮތުން އޭޑީކޭ އިން ޓެސްޓެއް ހަދައިދޭ އަގަކީ 675 ރުފިޔާ އަށް ކަމަށާއި އައިޖީއެމްއެޗުން ޓެސްޓު ކުރުމަށް އެއްވެސް ފީ އެއް ނުނަގާނެ ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ، އޭޑީކޭ އިން ހަދާ ޓެސްޓުތަކުގެ ބިލްތައް ފޮނުވާނީ އައިޖީއެމްއެޗަށް ކަމަށާއި އެހިސާބުން ފައިސާ ދެއްކުމުގެ މަސައްކަތް ސަރުކާރުން ކުރާނެ ކަމަށެވެ.
އޭޑީކޭ އަށް އާންމު ރައްޔިތަކު ދިޔަ ކަމުގައި ވިޔަސް ޓެސްޓް ނުހެދޭނެ ކަމަށާއި އެ ހޮސްޕިޓަލްގެ ލެބޯޓްރީ އިން ޕްރޮސެސް ކުރާނީ އެޗްޕީއޭ އިން ނަގާ ސާމްޕަލްތައް ކަމަށް މަބްރޫކް ވިދާޅުވި އެވެ.
