އާޒިމް، ރިޔާޒަށް: މަޖިލިސް ރައީސް ގަވާއިދާ ހިލާފަށް ކުރެއްވީ ކޮންކަމެއްތޯ؟!
މަޖިލިސް ރައީސް، ރައީސް މުހައްމަދު ނަޝީދު މަޖިލީހުގެ ގަވައިދާ ހިލާފަށް ކުރައްވާފައިވަނީ ކޮން ކަމެއް ކަން ހާމަކޮށްދިނުމަށް ތިމަރަފުށީ ދާއިރާގެ މެންބަރު އަބްދުﷲ ރިޔާޒަށް، އެމްޑީޕީގެ ޕީޖީ ގުރޫޕްގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ގޮވާލައިފި އެވެ.
މިދިޔަ ހޯމަ ދުވަހުގެ ރޭ ދަންވަރުމަޖިލީހުގައި ބޭއްވި ޖަލްސާގައި ގާނޫނު އަސާސީއަށް ގެންނަ އިސްލާހުގެ މަސައްކަތް އިދިކޮޅު ކޯލިޝަނުން ލަސް ކުރައްވާ ކަމަށް ވިދާޅުވެ މަޖިލީހުގެ ރައީސް ނަޝީދު ވާހަކަދެއްކެވުމުން ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ޖަލްސާގައި އަޑުގަދަ ކުރައްވާފަ އެވެ. އެއާއެކު ރައީސް ނަޝީދު ވަނީ ޝިޔާމްގެ ނަން އިއްވާ މަޖިލީހުގެ ތަޅުން ދޫކުރައްވާ ވަޑައިގަތުމަށް އަންގަވާފަ އެވެ.
ނަމަވެސް އެކަމަށް ޝިޔާމް ދެކޮޅު ހެދުމުން އެމްޑީޕީ މެމްބަރުން އޭނާ ތަޅުމުން ނެރެން މަސައްކަތް ކުރުމުގެ ތެރޭގައި، އެ މެމްބަރުންނާ ދެމެދު ހިނގި ކުރިމަތިލުންތަކެއްގައި ޝިޔާމަށް ވަނީ އަނިޔާ ވެފަ އެވެ.
އެކަމާ ގުޅިގެން ރިޔާޒް ވިދާޅުވީ ޖަލްސާގައި ރައީސް ނަޝީދު އަމަލު ކުރައްވާފައިވަނީ މަޖިލީހުގެ ގަވާއިދާއި ހިލާފަށްކަމަށެވެ. އެގޮތުން މަޖިލިހުގެ ޖަލްސާއެއް ހިގަމުންދާއިރު މަޖިލިހުގެ ރައީސްގެ އަމުރަށް މެމްބަރަކު ކިޔަމަން ނުވެއްޖެނަމަ ރިޔާސަތުން އަދި މެމްބަރުން އަމަލު ކުރަންޖެހޭ ގޮތް މަޖލީހުގެ ގަވާއިދުގެ 65 ވަނަ މާއްދާގައި ތަފްސީލްކޮށް ބަޔާންކޮށްފަވާ ކަމަށެވެ. ނަމަވެސް އެރޭ ކަން ހިނގާ ގޮސްފައި ވަނީ ގަވާއިދާ ހިލާފަށް ކަމަށް ރިޔާޒް ވިދާޅުވެފައިވެ އެވެ.
އެކަމަށް ރައްދު ދެއްވައި އާޒިމް ވަނީ ރިޔާޒަށް ސުވާލެއް ކުރިމަތި ކުރައްވާފަ އެވެ. އާޒިމް ވިދާޅުވީ ރައީސް ނަޝިދު މަޖިލީހުގެ ގަވައިދާ ހިލާފަށް ޖަލްސާގައި ކުރެއްވި ކޮން ކަމެއްތޯ ހާމަ ކޮށްދިނުމަށެވެ.
ހޯމަ ދުވަހުގެ ރޭ ދަންވަރު ބޭއްވި ޖަލްސާގައި ރައީސް ނަޝީދު އަމަލު ކޮށްފައިވަނީ ގަވައިދާ ހިލާފަށް ކަމަށްބުނެ އިދިކޮޅު މެންބަރުން ދަނީ ފާޑު ވިދާޅުވަމުންނެވެ. އެގޮތުން ވިލިމާލެ ދާއިރާގެ މެންބަރު އަހުމަދު އުޝާމް ވިދާޅުވީ މަޖިލީހުގައި ނަން އިއްވުމުން ގަވާއިދަށް ހުރުމަތްތެރިކޮން ހިތައި ބޭރަށް ނުކުންނަވަން ޖެހޭނެ ކަމަށެވެ. އަދި އެމެންބަރަކު ނުނިކުމެއްޖެނަމަ އަމަލުކުރަންޖެހޭ ގޮތްވެސް ގަވާއިދުގައިވާ ކަމަށެވެ. ނަމަވެސް އެއާހިލާފަށް މަޖިލީހުގެ މެންބަރުންގެ މެދުގައި ހަމަނުޖެހުން ހިންގުމަށް ހިތްވަރު ލިބޭ ގޮތަށް ރިޔާސަތުން އަމަލުކުރުމަކީ ދެރަކަމެއް ކަމަށް އޭނާ ވިދާޅުވި އެވެ.
މީގެ އިތުރުން އޭދަފުށީ ދާއިރާގެ މެމްބަރު އަދި މަޖިލީހުގެ މައިނޯރިޓީ ލީޑަރު އަހުމަދު ސަލީމް ވެސް ވަނީ ނަޝީދަށް ފާޑު ވިދާޅުވެފަ އެވެ. އޭނާ ވިދާޅުވީ އެޖަލްސާގައި ފެނިގެން ދިޔައީ ރާއްޖޭގެ ތާރީހުގައި ފުރަތަމަ ފަހަރަށް މަޖިލީހުގެ ރައީސަކު މެންބަރަކަށް އަނިޔާ ކުރުމަށް އަމުރުކުރި މަންޒަރު ކަމަށެވެ. އެއީ ބަލައިގަނެވޭނެ ކަމެއް ނޫން ކަމަށެވެ.
