އެމްޕީ ޝިޔާމްގެ ހައްގުގައި ނައިފަރުން ދެއްކި ސާބިތުކަމަށް މުއިއްޒުގެ ޝުކުރު!

ނައިފަރު ދާއިރާގެ މަޖިލިސް މެމްބަރު އަހުމަދު ޝިޔާމްގެ ހައްގުގައި މިއަދު ނައިފަރު ރައްޔިތުންގެ ދެއްކެވި ސާބިތުކަމަށް މާލޭ ސިޓީގެ މޭޔަރު ކަމަށްވާދަ ކުރައްވާ ކެނޑިޑޭޓް އަދި ޕީޕީއެމްގެ ނައިބް ރައީސް ޑރ. މުހައްމަދު މުއިއްޒު ޝުކުރު ދަންނަވައިފިއެވެ.

Ads by Sosun Fihaara

މިދިޔަ ހޯމަ ދުވަހުގެ ރޭ ދަންވަރު ބޭއްވި މަޖިލިސް ޖަލްސާގައި މެމްބަރު ޝިޔާމް، މަޖިލިސްގެ ތަޅުމުން ނެރެން އުޅުމުގެ ތެރޭގައި އަނިޔާވެފައިވާތީ، އެކަމާ ގުޅިގެން މިއަދު ހަވީރު އިދިކޮޅު ފަރާތްތަކުން ވަނީ ނައިފަރުގައި މުޒާހަރާ ކޮށްފައެވެ.

އެ މުޒާހަރާގެ ފޮޓޯތައް ހިއްސާ ކުރައްވަމުން މުއިއްޒު ކުރެއްވި ޓްވީޓެއްގައި ވިދާޅުވީ ނައިފަރު ރައްޔިތުންނަކީ އަބަދުވެސް އިންސާފަށް ލޯބިކުރައްވާ ހައްގު ބަސް ބުނުމުގައި ކުރީސަފުގައި ތިއްބަވާ ގައުމުގެ ދެކެ ލޯބިވާ ރައްޔިތުންތަކެއް ކަމަށެވެ.

"އެމްޕީ ޝިޔާމްގެ ހައްގުގައި މިއަދު ނައިފަރު ރައްޔިތުންގެ ދެއްކެވި ސާބިތުކަމަށްޓަކާ މަރުހަބާ ދަންނަވަން" މުއިއްޒު ވިދާޅުވިއެވެ.

ޕީޕީއެމްގެ އޮފިޝަލަކު ވިދާޅުވީ އެ އިހުތިޖާޖަކީ ނައިފަރު ދާއިރާގެ މެންބަރު ޝިޔާމަށް މަޖިލިސް ތެރޭގައި ކުރި އަނިޔާ ކުށްވެރިކޮށް ރަށުގެ ގިނަ ރައްޔިތުން ބައިވެރިވެގެން ބޭއްވި ސުލްހަވެރި އެއްވުމެއް ކަމަށެވެ.

މި އިހްތިޖާޖްގެ ބައިވެރިން ތިބީ މާސްކް އަޅައިގެންނެވެ. އަދި ބައިވެރިން ތިބީ ދުރުދުރުގައި ބަހައްޓާފައިވާ ގޮނޑިއެއް ކައިރީގައި ޝުއޫރުތައް ލިޔެފައިވާ ބޯޑުތައް ހިފައިގެނެވެ.

ހޯމަ ދުވަހުގެ ރޭ ދަންވަރު 1:30 ގައި ބޭއްވި ޖަލްސާގައި ގާނޫނު އަސާސީއަށް ގެންނަ އިސްލާހުގެ މަސައްކަތް އިދިކޮޅު ކޯލިޝަނުން ލަސް ކުރާ ކަމަށް ވިދާޅުވެ މަޖިލީހުގެ ރައީސް ނަޝީދު ވާހަކަ ދެއްކެވުމުން ނައިފަރު ދާއިރާގެ މެމްބަރު އަހުމަދު ޝިޔާމް ވަނީ ޖަލްސާގައި އެކަމަށް ރައްދު ދެއްވާފައެވެ. އެއާއެކު ރައީސް މުހައްމަދު ނަޝީދު ވަނީ ޝިޔާމްގެ ނަން އިއްވާ މަޖިލީހުގެ ތަޅުން ދޫކުރައްވާ ވަޑައިގަތުމަށް އަންގަވާފައެވެ.

ނަމަވެސް އެކަމަށް ޝިޔާމް ދެކޮޅު ހެދުމުން އެމްޑީޕީ މެމްބަރުން އޭނާ ތަޅުމުން ނެރެން މަސައްކަތް ކޮށް އެ މެމްބަރުންނާ ދެމެދު ކޮންމެވެސް ވަރެއްގެ ކުރިމަތިލުންތަކެއް ހިނގާ ދެބައި މީހުންނަށް ވަނީ އެކި ވަރުގެ އަނިޔާ ވެފަ އެވެ. އަނިޔާތަކަށް ޝިޔާމް ވަނީ އޭޑީކޭ ހޮސްޕިޓަލުގައި ފަރުވާ ހޯދާފަ އެވެ.

ޕީޕީއެމުން ބުނި ގޮތުގައި އޭނާގެ މައިބަދަ އާއި މޭކަށިގަނޑުގައި ވަނީ ރެދެއް ލައިފަ އެވެ. އަދި ހަތަރު ހަފްތާއަށް އޭނާ ބެޑް ރެސްޓު ކުރަން ޑޮކްޓަރުން ލަފާދީފައިވާ ކަމަށް އެ ޕާޓީން ބުންޏެވެ.

މަޖިލީހުގެ ރައީސް މުހައްމަދު ނަޝީދު އަންގަވައިގެން ޝިޔާމަށް އަނިޔާ ކުރީ ކަމަށް ތުހުމަތުކޮށް އިދިކޮޅު ކޯލިޝަންގެ މެންބަރުން އެ ރޭގައި ފުލުސް އޮފީހަށް ވަޑައިގެންނެވި އެވެ. އަދި އެ މައްސަލަ ފުލުސް އޮފީހަށް ރިޕޯޓް ކުރި އެވެ. ފުލުހުން ބުނެފައިވަނީ އެމައްސަލައިގައި ބަލަން ޖެހޭ ކަންކަން ބަލަމުންދާ ކަމަށެވެ.