ކެޕްޓަން ފައްސިވުމުން ދަތުރުތައް މެދުކަނޑާލި އަމާޒު ބޯޓުން އަލުން ދަތުރުތައް ފަށައިފި
ކެޕްޓަން ކޯވިޑް-19 އަށް ފައްސިވުމާ ގުޅިގެން ދަތުރުތައް މެދުކަނޑާލި ށ. ނަރުދޫ އަމާޒު ބޯޓުގެ ދަތުރުތައް އަލުން ފަށައިފިއެވެ.
މާލެއާ ދެމެދު ދަތުރުކުރާ އެ ބޯޓުގެ ދަތުރުތައް އިއްޔެ ފަށާފައިވާއިރު ނަރުދޫ ކައުންސިލް މެމްބަރު މުޙައްމަދު ނިޒާރު "ތިލަދުން" ނޫހަށް ވިދާޅުވީ އަމާޒު ބޯޓުގެ ދަތުރުތައް އަލުންފެށީ ކަމާބެހޭ އިދާރާތަކުގެ އިރުޝާދު ހޯދުމަށް ފަހުގައި ކަމަށެވެ.
އަމާޒު ބޯޓުގެ ކެޕްޓަން ކޯޑަށް ފައްސިވިކަން އެޗްޕީއޭ އިން އެންގީ މިއަހަރުގެ އެޕްރީލް މަހުގެ 25 ވަނަ ދުވަހުއެވެ.
މި ބޯޓުން 98 މީހަކު ދަތުރުކޮށްފައިވާއިރު މި ބޯޓަކީ މި މަހުގެ 15 ވަނަ ދުވަހު މާލެއިން ފުރި ބޯޓެކެވެ. މި ބޯޓު ވަނީ ނ. މާފަރާއި ހެނބަދޫ، މިލަދޫ، ވެލިދޫ، ކެނދިކުޅުދޫ، ހޮޅުދޫ އަދި ށ. ނަރުދޫ، ފުނަދޫ، މާއުނގޫދޫ އަދި ފީވައްގެ އިތުރުން ހއ. އުތީމާއި ދިއްދޫ އަށް ދަތުރުކޮށްފައިވައެވެ.
އެ ބޯޓުގެ ކެޕްޓަން ފައްސިވި ފަހުން ނަރުދޫން އެ ބައްޔަށް 11 މީހަކު ވަނީ ފައްސިވެފައެވެ. ނަމަވެސް މިހާރު އެ އެންމެން ވަނީ މުޅިން ބަލިން ރަނގަޅުވެ ރަށަށް ވެސް ބަދަލުކޮށްފައެވެ.
