ޣައްޒާގެ ނިކަމެތި ކުދިންނާއި އެތައް މުސްލިމުންނަކަށް ހިނިތުންވުން ގެނެސްދިން ''ލޯތްބާއެކު2020"ނިންމާލައިފި

ބަރަކާތްތެރި ރަމަޟާން މަހާއި ދިމާކޮށް އިންޓަނޭޝަނަލް އެއިޑް ކެމްޕޭން (އައިއޭސީ) އިން ކުރިޔަށް ގެންދިޔަ ލޯތްބާއިއެކު 2020 ޕެންޑެމިކް ރިލީފް ކެމްޕޭން ކާމިޔާބު ކަމާއިއެކު ނިންމާލައިފިއެވެ.

Ads by STELCO

ލޯތްބާއިއެކު 2020 ކެމްޕޭން ކުރިޔަށް ގެންގޮސްފައިވަނީ ޔުގެންޑާ، ފަލަސްތީނު، ސީރިޔާ، ޔަމަން، ނޭޕާލްގެ އިތުރުން ބަންގްލަދޭޝްގައެވެ. ޝައްވާލްމަހުގެ ހަރޯދައަށް ފަހު ނިންމާލި މި ޕްރޮޖެކްޓަށް މިއަހަރު 4.7 މިލިއަން ރުފިޔާގެ އެހީ ލިބިފައިވެއެވެ. މި ފައިސާ ޚަރަދު ކޮށްފައިވަނީ އިފްތާރު ޕެކޭޖް ދިނުމުގެ އިތުރުން އެކި އާއިލާތަކަށް އެއްމަސްދުވަހުގެ ކާބޯތަކެތި ފޯރުކޮށް ދިނުމަށެވެ.

މި ކެމްޕޭން ކުރިޔަށް ދިޔަގޮތުގެ މަޢުލޫމާތު ހިއްސާކުރައްވަމުން އައިއޭސީގެ އިންޓަނޭޝަނަލް ރިލޭޝަން ހެޑް މުހައްމަދު އަލީ ވިދާޅުވީ އަހަރުގެ ޕެންޑެމިކް ހާލަތާއި ގުޅިގެން ކާބޯތަކެތީގެ ޕެކޭޖްތަކާއިއެކު މި ހާލަތާއި ގުޅުންހުރި ތަކެތި ހަދިޔާ ކުރުމުގެ އިތުރަށް ޔުގެންޑާއާއި، ފަލަސްތީނުގެ ގާޒާގެ އިތުރުން ނޭޕާލާއި ސީރިޔާގައި އައިއޭސީގެ ފަރާތުން ޢީދު ފާހަގަކުރިއެވެ. އެގޮތުން ޢީދު ފާހަގަކުރި ސަރަހައްދުތަކުގައި ޢީދު ހަދިޔާގެ ގޮތުގައި ހެދުން ހަދިޔާ ކުރުމާއި ޢީދުގައި ކެއްކުމަށް ކާބޯތަކެތި ބަހާފައިވެއެވެ. މީގެއިތުރުން ލުބުނާނުގެ ބޯޑަރު ސަރަހައްދުގައި ތިބި ސީރިޔާ ރައްޔިތުންނާއި ފަލަސްތީނު މީހުންނަށް ޢީދު ފާހަގަކުރުމަށް ގިނަ ހަރަކާތްތަކެއް ހިންގާފައިވެއެވެ. އެގޮތުން ބީއެމްއެކްސް ބައިކް ސްޓަންޓް ޝޯ އަކާއި ބައެއް ސަރަހައްދުތަކުގައި ކުޑަކުދިންނަށް ކުޅެވޭނެ ގޮތަށް ބާސްކެޓް ބޯޅަ ހޫޕް ހަރުކުރެވިފައިވެއެވެ.

ހެޑް މުހައްމަދު އަލީ ވިދާޅުވި ގޮތުގައި 6 ޤައުމެއްގެ މީހުންނަށް އަމާޒުކޮށްގެން ފެށި މި ކެމްޕޭން ވަރަށް ބޮޑަށް ފުޅާވެގެން ދިޔަ ކަމަށާއި މެލޭޝިއާގައި ތިބި ރޮހިންޔާ ދަރިފަސްކޮޅުގެ ރައްޔިތުންނަށްވެސް އެހީވެވުނު ކަމަށެވެ. މީގެއިތުރުން މިޔަންމާގެ ރަހީން ސްޓޭޓްގެ ނިކަމެތި ރައްޔިތުންނަށް ކާބޯތަކެތީގެ އެހީ މި ކެމްޕޭންގެ ތެރެއިން ފޯރުކޮށްދެވުންކަން މުހައްމަދު އަލީ ވަނީ އުފަލާއެކު ފާހަގަކޮށްފައެވެ. މީގެ އިތުރުން ބަންގްލަދޭޝްގައި އަނދައިގެންދިޔަ ކޭމްޕެއްގައި ތިބި ފަރާތްތަކަށް ރާއްޖޭގެ ކުންފުންޏެއްގެ ހެޔޮއެދުމާއިއެކު ކާބޯތަކެތި ހަދިޔާ ކުރެވިގެންދިޔަކަން ވެސް މުޙައްމަދު ޢަލީ ފާހަގަ ކުރެއްވިއެވެ.

ލޯތްބާއިއެކު 2020 ކެމްޕޭނުގެ ތެރެއިން ރެފިއުޖީ ކޭމްޕާއި، ސްލަމް ސަރަހައްދުތަކުގައާއި އަދި އެކި ގޮތްގޮތުން ހާލުގައި ޖެހިފައިވާ ގާތްގަނޑަކަށް 35,000 ނިކަމެތިންނަށް އެހީވެވިފައިވާކަން އައިއޭސީއިން ހާމަކުރެއެވެ.

އައިއޭސީއިން އުންމީދުކުރިވަރަށް ވުރެ މި ކެމްޕޭނަށް ދިވެހި ރައްޔިތުންގެ ފަރާތުން ބޮޑު ތަރުހީބެއް ލިބިފައިވާކަން އެ ފަރާތުން ވަނީ އުފަލާއިއެކު ފާހަގަކޮށްފައެވެ. އެގޮތުން ބައިނަލްއަގްވާމީ ގޮތުން ފަންޑު ހޯދުމުގެ މަސައްކަތާއި އެކު ކުރިޔަށް ގެންދިޔަ ކެމްޕޭނެއް ނަމަވެސް މި ކެމްޕޭނަށް ލިބިފައިވާ 99 އިންސައްތަ އެހީ އަކީ ދިވެހި ރައްޔިތުންގެ ފަރާތުން ލިބިފައިވާ އެހީތެރިކަމެއް ކަން އައިއޭސީއިން ހާމަކުރެއެވެ.

އިންޓަނޭޝަނަލް އެއިޑް ކެމްޕޭނުން ވަނީ ލޯތްބާއިއެކު ކެމްޕޭނުގައި އެހީތެރިކަން ފޯރުކޮށްދިން ވޮލަންޓިއަރުންނަށް ވަރަށް ބޮޑަށް ޝުކުރު އަދާކޮށްފައެވެ. މީގެއިތުރުން އައިއޭސީއާއިއެކު މި ކެމްޕޭނުގައި ޝާމިލްވި އިންޓަނޭޝަނަލް ޕާޓްނަރުން ވެސް މި ކެމްޕޭނުގެ ކާމިޔާބީ ފާހަގަކޮށް ޝުކުރު އަދާކޮށްފައިވެއެވެ.

ލޯތްބާއިއެކު 2020 ކެމްޕޭނަށް ފަހު އައިއޭސީން ރާވާފައިވާ ކަންކަމާއި ގުޅޭގޮތުން މަޢުލޫމާތު ހިއްސާކުރަމުން އެ ޖަމްޢިއްޔާއިން ބުނީ ޕެންޑެމިކް ރިލީފް ޕްރޮޖެކްޓް އިތުރަށް ކުރިޔަށް ގެންދެވޭނެ ގޮތްތަކާއި ގުޅޭ ގޮތުން މަޝްވަރާކުރަމުން ދާކަމަށެވެ. މީގެއިތުރުން، އިތުރު ފަހި ގޮތަކާއިއެކު ސަދަޤާތް ޖާރިޔާ ޕްރޮޖެކްޓް އިއުލާން ކުރުމުގެ މަސައްކަތް ކުރަމުން އަންނަކަމަށާއި އަމްފަން ސައިކްލޯންގެ ސަބަބުން ހާލުގައި ޖެހިފައިވާ ފަރާތްތަކަށް އެމެޖެންސީ ރިލީފް ފޯރުކޮށްދިނުމާއި ގުޅޭގޮތުން އައިއޭސީގެ ޕާޓްނަރުންނާއި އެކު މަޝްވަރާ ކުރަމުން އަންނަކަން އައިއޭސީއިން ފާހަގަކުރެއެވެ.

މަޝްވަރާތަކަށް ފަހު މި ކަންކަމުގެ މަޢުލޫމާތު ދިވެހި ރައްޔިތުންނަށް ފޯރުކޮށްދޭނެ ވާހަކަ އައިއޭސީއިން ހާމަކުރެއެވެ.

އިންޓަނޭޝަނަލް އެއިޑް ކެމްޕޭނުން ވަނީ މި ކެމްޕޭނަށް އެކި ގޮތްގޮތުން އެހީތެރިކަން ފޯރުކޮށްދީ، ޑޮނޭޝަން ދެއްވި ފަރާތްތަކުން އެ ފަރާތަކަށް ވެވުނު ގޮތަކަށް އަބަދުވެސް އެހީތެރިކަން ފޯރުކޮށްދެމުންގެންދާތީ އެކަން އެކަން ފާހަގަކޮށް އެކަމަށް ޝުކުރު އަދާކޮށްފައެވެ.

އިންޓަނޭޝަނަލް އެއިޑް ކެމްޕޭނާއި ބެހޭގޮތުން އިތުރު މަޢުލޫމާތު ބޭނުންވާ ފަރާތްތަކުން އައިއޭސީގެ ފޭސްބުކް ޕޭޖު (https://www.facebook.com/IACMaldives/) އިން އެ މަޢުލޫމާތު ލިބޭނެއެވެ.

އިންޓަނޭޝަނަލް އެއިޑް ކެމްޕޭނުން އަބަދުވެސް އަންނަނީ ދުނިޔޭގެ އެކި ކަންކޮޅުތަކުގައި އެހީތެރިކަމަށް ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަށް ގިނަ ގުނަ މަސައްކަތްތަކެއް ކުރަމުންނެވެ.