ނިއުޒީލޭންޑުގެ ސްކޫލްތަކުގައި އަންހެން ކުދިންނަށް ހިލޭ ޕެޑު ދެނީ!
ނިއުޒީލޭންޑުގެ ސްކޫލްތަކުގައި އަންހެން ކުދިންނަށް ހިލޭ ޕެޑު ދިނުމަށް ނިންމައިފިއެވެ.
އެޤައުމުގެ ސަރުކާރުން މިފަދައިން ނިންމީ، ފަގީރުކަމުގެ ސަބަބުން ޕެޑުގަތުމަށް ދަތިވެފައިވާ ކުދިންނަށް އެހީތެރިވުމުގެ ގޮތުން ކަމުގައި ރިޕޯޓުތަކުން ބުނެފައިވެއެވެ.
ނިއުޒީލޭންޑުގެ ޕްރައިމް މިނިސްޓަރ ޖަސިންދާ އަރްދާން ވިދާޅުވީ އަންހެން ކުދިންނަށް ބޭނުންވާ ޕެޑާއި، ޓޭމްޕޯންސް ސަރުކާރުގެ ފަރާތުން ދޭން ނިންމީ އެކުދިންގެ ކިޔެވުމަށް އިތުރު ހިތްވަރެއް ދިނުމުގެ ގޮތުން ކަމަށެވެ.
"ގާތްގަނޑަކަށް 95،000 ޒުވާން އަންހެން ކުދިން، އެއީ އުމުރުން ނުވަ އަހަރާއި 18 އަހަރާއި ދެމެދުގެ އަންހެން ކުދިން، މައްސަރު ކަންތައް ޖެހުމުން ސްކޫލަށް ނުގޮސް ގޭގައި މަޑުކުރާކަން ވަނީ ރިކޯޑު ކުރެވިފަ. ސަބަބެއްގެ ގޮތުގައި ބުނެފައިވަނީ ސެނިޓެރީ ޕެޑް ފަދަ ތަކެތި ގަނެވެން ނެތުން" ޖަސިންދާ ވިދާޅުވިއެވެ.
މާލީ ހާލަތު ދަށްވުމުގެ ސަބަބުން އެފަދަ ކުދިން އެދުވަސްވަރު ބޭނުންކޮށް އުޅެނީ ފޮތިފަދަ ތަކެތި ކަމަށާއި، އެހެންކަމުން އެދުވަސްވަރު ސްކޫލަށް ހާޒިރުވާން ލަދުގަނެ، ގިނަ ފިލާވަޅުތަކެއް ގެއްލޭ ކަމަށް ވެސް ޖަސިންދާ ވިދާޅުވިއެވެ.
