ނުހިފޭ ރޯދަތަކަށް ކައްފާރާ ދިނުމުގެ ފަހި ފުރުސަތެއް! އެކެއްގެ ތިންއިރު ކޮއްތު -/75 ރުފިޔާ
އެކި އެކި ސަބަބު ތަކާއިހުރެ ރަމަޟާން މަހު ނުހިފި ހުރި ރޯދަތަކަށް ކައްފާރާ ދޭން ޖެހޭ މީހުން އެކަން ކުރުމަށް ފަސޭހަ ގޮތެއް އެހީ ޖަމިއްޔާއިން ތަޢާރަފު ކޮށްފިއެވެ. މިއީ ކައްފާރާ ދިނުމުގެ ކަންތަކުގައި ޢަމަލުކުރާނެ އެންމެ ފަސޭހަ އަދި ލުއިގޮތެއްގެ އިންތިޒާރުގައި ތިބި ވަރަށް ގިނަ ބޭފުޅުންނަށް ލިބިގެންދިޔަ ވަރަށް ބޮޑު ފަސޭހައެކެވެ. އެގޮތުން މިއީ ކޮވިޑް-19 އާއި ގުޅިގެން ދިވެހިރާއްޖޭގައި ދިރިއުޅޭ ބިދޭސީންނަށް އެހީވުމަށް އެހީ ޖަމިއްޔާއާއި ވެލްނެސް އެސޯސިއޭޝަން އަދި އެކްސްޕެކްޓް ސަޕޯޓް ވައިބާ ކޮމިއުނިޓީ (ބައި ރީނާ) ގުޅިގެން ކުރިޔަށް ގެންދާ ޕްރޮޖެކްޓަށް އިތުރު ވެގެން ދިޔަ ބޮޅެކެވެ.
ކޮވިޑް އިޖާބަ ނަމުގައި ކުރިޔަށް ގެންދާ ޕްރޮޖެކްޓްގެ ދަށުން އެހީއަށް ބޭނުންވެފައިވާ ބިދޭސީންނަށް ކޮއްތު ހަމަޖައްސައިދިނުމުގެ ފުރުސަތު ވަނީ ހުޅުވާލާފައެވެ.
އެހީ ޖަމިއްޔާއިން މަޢުލޫމާތު ދޭގޮތުގައި ރަމަޟާން މަހު އެކި ސަބަބު ތަކާއިހުރެ ނުހިފޭ ރޯދަތަކުގެ ކައްފާރާގެ ގޮތުގައި ކޮއްތު ދޭން ބޭނުންވާ ބޭފުޅުންނަށް މިއީ ވަރަށް ރަނގަޅު ފުރުސަތެކެވެ. އެގޮތުން ބިދޭސީއެއްގެ 3 އިރުގެ ކޮއްތު ހަމަޖައްސައި ދިނުމުގެ ފުރުސަތު ވަނީ ހުޅުވާލާފައިއެވެ. އަދި 3 އިރުގެ ކޮއްތުގެ އެހީތެރިކަން ފޯރުކޮށްދެވޭ ޕެކޭޖުގެ ޖުމްލަ އަގަކީ 75 ރުފިޔާއެވެ. އެހީ ޖަމިއްޔާއިން ވަނީ ކައްފާރާގެ ގޮތުގައި ކޮއްތު ފައިސާދޭން ބޭނުންވާ ބޭފުޅުން އެހީ ޖަމްއިއްޔާގެ އެކައުންޓް 7770000014820 އަށް ފައިސާ ޖަމާކުރުމަށް ފަހު އެޖަމިއްޔާގެ ވައިބާ ނަންބަރު 7803433 އަ ށް ރަސީދު ފޮނުވުމަށް އެދިފައެވެ.
ކޮވިޑް އިޖާބައިގެ ނަމުގައި ކުރިޔަށް ގެންދާ ޕްރޮޖެކްޓްގެ ދަށުން ފުރަބަންދުގެ ހާލަތާއި ގުޅިގެން ހާލުގައި ޖެހިފައިވާ އާއިލާތަކަށާއި ބިދޭސީންނަށް ކާބޯޓަކެތީގެ ޕެކޭޖްތައް އަދި ކާބޯތަކެތީގެ ޕާރުސަލްތައް ފޯރުކޮށްދިނުމުގެ މަސައްކަތް ދަނީކުރަމުންނެވެ.
އެހީ ޖަމިއްޔާއިން މަޢުލޫމާތުދޭގޮތުގައި މި ޕްރޮޖެކްޓަކީ ވަރަށް ކާމިޔާބު ޕްރޮޖެކްޓެކެވެ. ކޮވިޑް-19 ގެ ހާލަތާއި ގުޅިގެން އެހީއަށް ބޭނުންވެފައިވާ ގިނަ އާއިލާތަކަށާއި އަދި ގިނަ އަދަދެއްގެ ބިދޭސީއިންނަށް މިހާރުވެސް އެހީތެރިކަން ފޯރުކޮށް ދެވިއްޖެކަމަށް އެ ޖަމިއްޔާއިން ހާމަކުރެއެވެ.
Ads by STO
