މިފްކޯ އިން މަސްދަޅާއި ވަޅޯމަހުގެ އަގު ހެޔޮކޮށްފި
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން ވިއްކާ ފަސްމީރު ބްރޭންޑުގެ ވަޅޯމަހާއި މަސްދަޅުގެ އަގު ހެޔޮ ކޮށްފިއެވެ.
އެގޮތުން ކުރިން 120 ރުފިޔާ އަށް ވިއްކި ވަޅޯމަސް ކިލޯ މިހާރު 105 ރުފިޔާ އަށް ލިބޭނެ ކަމަށް މިފްކޯއިން ބުނެފައިވެއެވެ.
މީގެ އިތުރުން ކުރިން 640 ރުފިޔާއަށް ވިއްކި 48 ދަޅުގެ ތެޔޮމަސް ކޭސް މިހާރު ލިބޭނީ 575 ރުފިޔާއަށް ކަމަށް ބުނެފައި ވެއެވެ. އަދި 595 ރުފިޔާ އަށް ވިއްކި ފެން މަސްދަޅު ކޭހުގެ އަގު ވަނީ 530 ރުފިޔާ އަށް ހެޔޮ ކޮށްފައެވެ.
މިފެށުނު 2021 ވަނަ އަހަރު މިފްކޯ އިން ރައްޔިތުންނަށް އެތައް ގޮތަކުން ލުއި ފަސޭހަ ކޮށްދެއްވަން ވިސްނާފައިވާ ކަމަށް އެކުންފުނިން ވަނީ މީގެކުރިން ވެސް ބުނެފައެވެ.
ވަޅޯމަހާއި މަސްދަޅުގެ އަގުހެޔޮ ކުރުމުގެ އިތުރުން މިފްކޯއިން ވަނީ މަސްވެރިންނަށް ވެސް ލުއި ފަސޭހަ ކޮށްދީ، މަސްވެރިންނަށް ފައިދާ ވާނެ ފަދަ ގޮތަކަށް، އަދި ޒަމާނާ އެއްގޮތަށް ހެޔޮ ބަދަލުތަކެއް ގެނައުމަށް ނިންމާފައެވެ.
