އެމްއެމްޕީއާރްސީ މައްސަލާގައި ވަކި ބަޔަކު ފްރޭމް ކުރެވިގެން ނުވާނެ: ޣައްސާން
އެމްއެމްޕީއާރްސީގެ ވައްކަމުގެ މައްސަލާގައި ވަކި ބަޔަކު ފްރޭމް ކުރެވިގެން ނުވާނެ ކަމަށް ތ.ގުރައިދޫ ދާއިރާގެ މެމްބަރު އަދި ޕީޕީއެމްގެ ނައިބު ރައީސް ޣައްސާން މައުމޫން ވިދާޅުވެއްޖެއެވެ.
ޣައްސާން މިހެން ވިދާޅުވެފައިމިވަނީ އެމްއެމްޕީއާރްސީ މައްސަލާގައި އަވަހަށް ދައުވާ ކުރަން ޖެހޭ ފަރާތްތައް ކަނޑައެޅި އެ ފަރާތްތަކަށް ދައުވާ ކުރުމުގެ ކަންކަން މިހާރު ތައްޔާރު ކުރެވެމުންދާ ކަމަށް ހޯމް މިނިސްޓަރު އިމްރާން އަބްދުﷲ ރޭ ވިދާޅުވުމާ ގުޅިގެންނެވެ.
އެކަމާއި ގުޅިގެން ޣައްސާން މިއަދު ކުރެއްވި ޓްވީޓެއްގައި ވިދާޅުވީ ވަކި މީހަކަށް ވަކި ގޮތަކަށް އިންސާފު ނުލިބޭނެ ކަމަށެވެ. އެގޮތުން ރައްޔިތުންގެ މަޖިލީހުގެ ކުރީގެ މެންބަރު ޑރ. އަފްރާޝީމް އަލީ އާއި ނޫސްވެރިޔާ އަހުމަދު ރިލްވާން އާއި ބްލޮގާ ޔާމީން ރަޝީދު މަރުގެ މައްސަލަތަކުގެ އިތުރުން ކޮމިޝަނާ އޮފް ޕޮލިސް މުހައްމަދު ހަމީދުގެ ނަޒާހަތްތެރިކަން ވެސް ކަށަވަރު ކުރެވެންޖެހޭ ކަމަށް ގައްސާން ވިދާޅުވިއެވެ.
"ނައިފަރު ދާއިރާގެ މެމްބަރު އަހުމަދު ޝިޔާމް އަށް ހަމަލާދިން މައްސަލަ ވެސް ބަލަން ޖެހޭ. އެމްއެމްޕީއާރްސީ މައްސަލާގައި ވަކި ބަޔަކު ފްރޭމް ކުރެވިގެން ނުވާނެ. ޣައްސާން ވިދާޅުވިއެވެ.
Selective justice ge usoolun insaaf eh nulibeyne. Rilwan, Dr Afrasheem adhi Yamin Rasheed ge massalathakuge ithurun CP ge nazaahaihtherikan kashavaru kureven jehey. @Shiyamaldives ah hamalaa dhin massala belen jehey. MMPRC massalaigai vaki bayaku frame kurevigen nuvaane. https://t.co/jukaje3aWO
— Mohamed Ghassan Maumoon (@mgmaumoon) June 5, 2020
ދައުލަތުގެ މީޑިއާ "ޕީއެސްއެމް"ގެ ޕްރޮގްރާމެއްގައި ރޭ ވާހަކަފުޅު ދައްކަވަމުން ހޯމް މިނިސްޓަރ އިމްރާން ޢަބްދުﷲ ވިދާޅުވީ، އެމްއެމްޕީއާރުސީގެ ޚިޔާނާތުގެ މައްސަލާގައި ފުލުހުން ހިންގި ތަޙްޤީޤަށް ބޮޑެތި ކުރިއެރުންތަކެއް މިހާރު ލިބިފައިވާކަމަށެވެ. އެގޮތުން މި މައްސަލާގައި އެކި ގޮތްގޮތުން ޝާމިލްވެ، ބައިވެރިވެފައި ތިބި މީހުންގެ ޢަދަދު މިހާރު ވަރަށް ބޮޑަށް ސާފުވެފައި ވާކަމަށް މިނިސްޓަރު ވިދާޅުވިއެވެ.
އިމްރާން ވިދާޅުވީ އެ ހިޔާނާތުން މަންފާ ލިބުނު މީހުންގެ އަދަދު 260 އަށް ވުރެން މަތި ކަމަށް ބެލެވޭއިރު، އޭގެތެރެއިން ތުހުމަތުކުރެވޭ މީހުންނަށް އެއް ފަހަރާ ދައުވާ ކުރުމަކީ ކުރެވޭނެ ކަމެއް ނޫން ކަމަށެވެ. އެހެންކަމުން ދައުވާ ކުރުމުގައި އެންމެ އިސްކަންދޭން ޖެހޭ މީހުން ތަރުތީބު ކުރުމުގެ މަސައްކަތް ކުރަމުން އަންނަ ކަމަށް ވިދާޅުވި އެވެ.
