މެމްބަރެއްވެސް ޖިނާއީ ކުށެއް ކޮށްފިނަމަ އެކަން ބެލޭނެ: އުޝާމް
ރައްޔިތުންގެ މަޖިލީހުގެ މެންބަރެއްވެސް ޖިނާއީ ކުށެއް ކޮންމެތަނެއްގައި ކުރިނަމަވެސް އެކަން ބެލޭނެކަމަށް ވިލިމާލޭ ދާއިރާގެ އަމިއްލަ މެމްބަރު އަހުމަދު އުޝާމް ވިދާޅުވެއްޖެއެވެ.
ގާނޫނުއަސާސީ އިސްލާހު ކުރުމަށް މިދިޔަ ހޯމަ ދުވަހު މެންދަމު ބޭއްވި ޖަލްސާ ހޫނުވެ ރިޔާސަތުން އިދިކޮޅު ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހްމަދު ޝީޔާމްގެ ނަން އިވުމުން އޭނާ ތަޅުން ދޫކުރައްވައި ވަޑައިގަތުމަށް ދެކޮޅު ހެދެވުމުން އެމްޑީޕީ މެމްބަރުން ވަނީ އޭނާ ގަދަކަމުން ބޭރަށް ނެރެލާފައެވެ. ޝިޔާމް ގަދަކަމުން ނެރުމަށް މަސައްކަތް ކުރުމުގެ ތެރޭގައި ހަމަނުޖެހުން ހިނގައި، މެމްބަރުންނަށް ވަނީ އަނިޔާވެފައެވެ
އުޝާމް ކުރެއްވި ޓްވީޓެއްގައި ވިދާޅުވީ، ރައްޔިތުންގެ މަޖިލީހުގެ މެންބަރެއް ވެސް ޖިނާއީ ކުށެއް ކޮންމެ ތަނެއްގައި ކުރިނަމަވެސް އެކަން ބެލޭނެ ކަމަށެވެ.
އުޝާމް އިތުރަށް ވިދާޅުވީ ގާނޫނު އަސާސީ އާއި ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނާއި މަތީ މަރުހަލާގެ ކޯޓުތަކުގެ ނިންމުންތަކަށް ބެލުމުން އެކަން ސާފު ކަމަށެވެ.
ރައްޔިތުންގެ މަޖިލީހުގެ މެންބަރެއްވެސް ޖިނާއީ ކުށެއް ކޮންމެތަނެއްގައި ކުރިނަމަވެސް އެކަން ބެލޭނެކަން، ބަލަންޖެހޭނެކަން ގާނޫނުއަސާސީއާއި ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނާއި މަތީމަރުހަލާގެ ކޯޓުތަކުގެ ނިންމުންތަކަށް ބެލުމުން ވަރަށް ސާފު. https://t.co/29eAPmWuic
— Ahmed Usham (@a_usham) June 5, 2020
ހަމަނުޖެހުން ހިނގި މައްސަލަ ފުލުހުން ބަލައި ގާނޫނީ ފިޔަވަޅު އެޅުމަކީ ފުލުހުންގެ މައްޗަށް އޮތް ގާނޫނީ ވާޖިބެއް ކަމަށް ހޯމް މިނިސްޓަރު އިމްރާން އަބްދުﷲ ރޭ ވަނީ ވިދާޅުވެފައެވެ.
އެމްޑީޕީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވީ އިމްރާން ނިސްބަތްވެވަޑައިގަންނަވާ އަދާލަތު ޕާޓީއަކީ ރައްޔިތުންގެ ކުޑަވެސް ތާއީދެއް އޮތް ޕާޓީއެއް ނޫން ކަމަށެެވެ. އަދި ނިމިގެން ދިޔަ މަޖިލިސް އިންތިހާބްގައި އަދާލަތު ޕާޓީން ވާދަކުރި އެއްވެސް ކެންޑިޑޭޓަކަށް ގޮނޑިއެއް ކާމިޔާބުކުރެއްވިފައެއް ނުވެ އެވެެ.
"ގޮނޑިއެއްގެ މިންވަރުވެސް ކާމިޔާބުކުރެވިފައި ނުވި ނަމަވެސް މަޖިލީހުގެ ނިޒާމަށ ހުރަސް އަޅައި މަޖިލީހުގެ އިންތިޒާމްތަކުގެ ތެރެއަށް އަރައިގަތުމުގެ ވިސްނުން ޝެއިހް އިމްރާން ހުރެގެން ނުވާނެ" ހަސަން ލަތީފް ކުރެއްވި ޓުވީޓުގައިވެ އެވެ.
