ޝިދާތާގެ ނުރުހުން އެމްޑީޕީއަށް: ވެރިކަމަށް އަންނަން ވޯޓުކޮޅު ހަމަކޮށްދެނީ އަދާލަތުން!
އަދާލަތު ޕާޓީއަށް މަޖިލިސް ތެރެއިން ގޮނޑިއެއް ނުލިބުނު ނަމަވެސް އަދި އެޕާޓީއަކީ ކިތަންމެ ކުޑަ ޕާޓީއެއް ނަމަވެސް ވެރިކަމަށް އަންނަން ބޭނުންވާ ކޮންމެ ފަހަރަކު ވޯޓުކޮޅު ހަމަ ކޮށްދެނީ އެޕާޓީން ކަމަށް އަދާލަތުގެ ޚާރިޖީ ގުޅުންތަކާ ބެހޭ ކޮމިޓީގެ ރައީސް ޝިދާތާ ޝަރީފް ވިދާޅުވެއްޖެއެވެ.
ޝިދާތާ މިހެން ވިދާޅުވީ، މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު އަދާލަތު ޕާޓީއަށާއި ހޯމް މިނިސްޓަރު އިމްރާން އަބްދުﷲ އަށް ފާޑު ވިދާޅުވެ ދެއްކެވި ވާހަކައަށް ރައްދު ދެއްވަމުންނެވެ.
ގާނޫނުއަސާސީ އިސްލާހު ކުރުމަށް މިދިޔަ ހޯމަ ދުވަހު މެންދަމު ބޭއްވި ޖަލްސާ ހޫނުވެ ހަމަނުޖެހުން ހިނގި މައްސަލަ ބަލައި ގާނޫނީ ފިޔަވަޅު އެޅުމަކީ ފުލުހުންގެ މައްޗަށް އޮތް ގާނޫނީ ވާޖިބެއް އިމްރާން ވިދާޅުވުމާ ގުޅިގެން ލަތީފު ވިދާޅުވީ ރައްޔިތުންގެ ކުޑަވެސް ތާއީދެއް އެއްވެސް ދާއިރާއަކުން އަދާލަތު ޕާޓީއަށް ލިބި ރައްޔިތުން މަޖިލީހުގެ ގޮނޑިއެއްގެ މިންވަރުވެސް ކާމިޔާބު ކުރެވިފައި ނުވާއިރު، މަޖިލީހުގެ ނިޒާމަށް ހުރަސް އަޅާ މަޖިލީހުގެ އިންތިޒާމުތަކުގެ ތެރެއަށް އަރައިގަތުމުގެ ވިސްނުން ހުރެގެން ނުވާނެ ކަމަށެވެ.
ލަތީފުގެ މިވާހަކައާ ހިތްހަމަޖެހިވަޑައި ނުގަތް ޝިދާތާ ފޭސްބުކްގައި ކުރެއްވި ޕޯސްޓެއްގައި ވިދާޅުވީ އަދާލަތު ޕާޓީއަށް މަޖިލިސް ތެރެއިން ގޮނޑިއެއް ނުލިބުނު ނަމަވެސް އަދި އެޕާޓީއަކީ ކިތަންމެ ކުޑަ ޕާޓީއެއް ނަމަވެސް ވެރިކަމަށް އަންނަން ބޭނުންވާ ކޮންމެ ފަހަރަކު ވޯޓުކޮޅު ހަމަ ކޮށްދެނީ އެޕާޓީން ކަމަށެވެ. ނަމަވެސް މިއަދު އެކަން ބޮޑެތި ޕާޓީތަކުން ހަނދާން ނެތިފައިވާ ކަމަށް ޝިދާތާ ވިދާޅުވިއެވެ.
ޝިދާތާ ވިދާޅުވީ މަޖިލިސް ތެރޭގައި ހިނގާ ކަންކަމުގެ ތެރެއަށް އިމްރާން ވަންނަނީ އަދާލަތު ޕާޓީގެ ރައީސްގެ ހައިސިއްޔަތުން ނޫން ކަމަށާއި އެކަންކަމުގެ ތެރެއަށް އެމަނިކުފާނު ވަންނަނީ ހޯމް މިނިސްޓަރުގެ ހައިސިއްޔަތުން ކަމަށެވެ. އަދި މިނިސްޓަރު އިމްރާން ކުރައްވަނީ އެމަނިކުފާނަށް ހަވާލު ކުރެވިފައިވާ ގާނޫނީ ޒިންމާ ކަމަށްވެސް ޝިދާތާ ވިދާޅުވިއެވެ.
ޝީދާތާ ވިދާޅުވީ މަޖިލީހުގެ މެމްބަރުކަން ވެސް ކުރަންވާނީ އަދި "ބިޔަ ބޮޑު" ޕާޓީގެ ޗެއާޕާސަންގެ މަގާމު އަދާ ކުރަންވާނީ އެކަންކަން ދަންނަ މީހުން ކަމަށެވެ.
އަދާލަތު ޕާޓީގެ ސްލޮޓެއްގައި ޖެންޑާ މިނިސްޓަރުގެ މަގާމުގައި ހުންނަވަނިކޮށް މަޖިލީހުން އިތުބާރު ނެތް ކަމުގެ ވޯޓެއް ނަގަން އެމްޑީޕީން ނިންމާފައި ވަނިކޮށް ޝިދާތާ އިސްތިއުފާ ދެއްވާފައި ވަނީ މިދިޔަ ފެބްރުއަރީ މަހުގެ 6 ވަނަ ދުވަހުއެވެ.
