ރާއްޖޭގެ ރަށްރަށުގައި ވެހިކަލް ދުއްވޭނެ އަދަދު ކަނޑައަޅަނީ
މާލެ ސަރަހައްދާއި، ރާއްޖޭގެ ހުރިހާ ރަށެއްގައިވެސް ވެހިކަލްތައް ދުއްވޭނެ އަދަދު ކޮންޓްރޯލް ކުރުމުގެ މަސައްކަތްތަކެއް ކުރަމުންދާ ކަމަށް ޓްރާސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައި ވަނީ ރައްޔިތުންގެ މަޖިލީގުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި ފުވައްމުލަކު މެދު ދާއިރާގެ މެމްބަރު ހުސެއިން މުހައްމަދު ދީދީ ކުރެއްވި ސުވާލަކަށް ޖަވާބު ދެއްވަމުން ނެވެ.
ނަހުލާ ވިދާޅުވީ މާލެ ސަރަހައްދާއި އަތޮޅުތެރޭގެ އެކި ރަށްތަކުގައި ވެހިކަލް ކޮންޓްރޯލް ކުރުމަށް ނުވަތަ "ކޯޓާ" ސިސްޓަމެއް ގެންގުޅުމަކީ އެ މިނިސްޓްރީން ޕްލޭން ކުރަމުންދާ ކަމެއްކަމަށެވެ.
މިސަރުކާރު ވެރިކަމާއި ހަވަލުވިތާ މަދު ދުވަސްތަކެއްގެ ތެރޭގައި މިނިސްޓްރީން ވެހިކަލް ކޮންޓްރޯ ކުރުމާއި ބެހޭ ޚާއްސަ ކަރުދާހެއް ތައްޔާރުކޮށް ހުށަހަޅާފައިވާނެކަމަށް ނަހުލާ ވިދާޅުވިއެވެ. އެގޮތުން، ވަކި އަހަރުތަކެއް ވެފައިވާ އުޅަދުތަކާއި، ވެހިކަލްގެ ހާލަތަށް ބަލައި ނުދުއްވޭ ވަރުގެ އުޅަދުތަކުގެ ހުއްދަ ބާތިލްކުރުމަށް ޕްލޭން ކުރެވިފައިވާކަމަށްވެސް ޓްރާންސްޕޯޓް މިނިސްޓަރު ވިދާޅުވިއެވެ.
މިނިސްޓަރ ވިދާޅުވީ މިކަމުގައިވެސް ދިމާވި އެންމެބޮޑު ގޮންޖެހުމަކީ ބޮޑެތި ލޯންތައް ނަގައިގެން ޓެކްސީގަނެ އޭގައިން މުޅި ދިރިއުޅުމުގެ ކަންކަން ބަލަހައްޓަމުންދާ ބޭފުޅުންގެ ވެހިކަލްތައް ކުއްލިއަކަށް ނަގައިފިނަމަ އެކަމުގެ ދަތިކަން އެއާއިލާތަކަށް ކުރާނެތީކަމަށާއި މިކަމުގައި މިނިސްޓްރީން އެބޭފުޅުންނަށްވެސް ދަތިނުވާނޭ ގޮތަކަށް ގިނަ ދުވަސްވީ އުޅަދުތައް އާކުރެވޭނެ ވިސްނުމެއް ގެންގުޅޭކަމަށެވެ.
މާލޭގައި ވެހިކަލްތައް ގިނަވެ ޕާކްނުކުރެވޭ މައްސަލައަކީވެސް ބޮޑުވެފައިވާ މައްސަލައެއް ކަމަށާއި މިކަމަށް ހައްލެއް ގެނައުމަށް ޕްލޭންކުރެވި ބަޖެޓް ކުރެވިފައިވާ ގިނަ މަސައްކަތްތަކެއް ކަމަށާއި ނަމަވެސް ކޮވިޑް19ގެ ސަބަބުން އެކަން ވެސް މަޑު ޖެހިފައިވާކަމަށް މިނިސްޓަރ ވިދާޅުވިއެވެ.
Ads by STO
