ރައީސް ޔާމީންގެ އަބުރާއި ބެހިގެން އެއްވެސް މީހަކު ވަޒީފާއިން ވަކިކޮށްފައެއް ނުވާނެ: އަދުރޭ
ކުރީގެ ސަރުކާރުގައި ރައީސް އަބްދުﷲ ޔާމީންގެ އަބުރާއި ބެހިގެން އެއްވެސް މީހަކު ވަޒީފާއިން ވަކިކޮށްފައި ނުވާނެ ކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އަދުރޭ މިހެން ވިދާޅުވީ ރައީސް އިބްރާހީމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް މީސް މީޑިއާގައި ފާޑުކިޔާފައިވާ ކަމަށް ބުނެ ހިތަދޫ ޕޯޓް ލިމިޓެޑްގެ މުވައްޒަފަކު ވަޒީފާއިން ވަކިކޮށްފައިވާ ކަމަށް އަންގާ ޗިޓް ފޮނުވުނީ އިދާރީ އޮޅުމަކުން ކަމަށް އެމްޕީއެލް އިން ބުނެފައި ވަނިކޮށެވެ.
ރޭ "ޗެނަލް 13"ގެ ޕްރޮގްރާމެއްގައި ވާހަކަދައްކަވަމުން އަދުރޭ ވިދާޅުވީ ރައީސް ސޯލިހު ރިޔާސީ އިންތިޚާބުގައި އެމަނިކުފާނުގެ ވެރިކަމެއްގައި ސިޔާސީ ޚިޔާލު ތަފާތުވެ، ޤާނޫނު އަސާސީން ލިބިފައިވާ ޚިޔާލު ފާޅުކުރުމުގެ މިނިވަންކަން ބޭނުންކުރުމުގެ ސަބަބުން މީހެއްގެ ވަޒީފާއަށް ބުރޫ ނާރާނެކަން ކަށަވަރުކޮށްދީފައިވާ ކަމަށެވެ.
ނަމަވެސް އެކަން އެގޮތަށް ނުހިނގާކަން ފާހަގަކުރައްވަމުން އަދުރޭ ވަނީ މިދިޔަ ސަރުކާރުގައި ޔާމީންގެ އަބުރާއި ކިތަންމެ ވަރަކަށް ބެހުނު ނަމަވެސް އެކަމާއި ގުޅިގެން މީހަކު ވަޒީފާ އިން ވަކިކޮށްފައި ނޯންނާނެ ކަމަށް ވިދާޅުވެފައެވެ.
"ގޮންޖަހާފައި މި ދަންނަވަނީ މިދިޔަ ސަރުކާރުގައި ނޯންނާނެ ރައީސް ޔާމީންގެ އަބުރާއި ބެހިގެން މީހަކު ވަޒީފާ އިން ވަކިކޮށްފައެއް. ކިހާވަރަކަށްތޯ އަބުރާއި ބެހުނީ. މިއަދު ވެރިކަމުގައި މިއޮތް ޕާޓީއަށް ތާއީދުކޮށް ހިންގަމުންގެންދާ ޓީވީ ޗެނަލަކުން ކޮންފަދަ ހަޑިހުތުރު ވާހަކަތަކެއްތޯ ދެއްކީ. ކޮންފަދަ އިލްޒާމުތަކެއްތޯ އެޅުވީ. މިއަދުގެ ހޯމް މިނިސްޓަރު ދެއްކެވީ ކޮންފަދަ ވާހަކައެއްތޯ. ރައީސް ޔާމީންގެ އަބުރާއި ބެހިގެން ވަޒީފާއިން ވަކިކުރި މީހެއްގެ ޗިޓެއް ދައްކަވާ، ނޯންނާނެ" އަދުރޭ ވިދާޅުވިއެވެ.
މިއީ އިންސާފުވެރި ސަރުކާރެއް ނޫން ކަމަށް ބުނެ އަދުރޭ ވަނީ ވަޒީފާ އިން ވަކިކުރަން ވެގެން ފޮނުވި ޗިޓުގައި ސޮއިކުރީ އޭގައި އޮތް އެއްޗެއް ނުކިޔައި ކަމަށް ގަބޫލުނުކުރެވޭނެ ކަމަށްވެސް ވިދާޅުވެފައެވެ. އެގޮތުން އެއީ ގަސްދުގައި ކުރި ކަމެއް ކަމަށާއި ނަމަވެސް އަޑުތައް ފެތުރިގެން ދިޔުމުން އެއީ "އޮޅުމެއް" ކަމަށް ބުނަނީ ކަމަށްވެސް އަދުރޭ ވިދާޅުވިއެވެ.
އެ މުވައްޒަފު ވަޒީފާއިން ވަކި ކުރީ އިދާރީ ގޮތުން އެރި އޮޅުމެއް ކަމަށް އެމްޕީއެލްގެ ސީއޯއޯ ޝާހިދު އަލީ ވިދާޅުވި ނަމަވެސް، ދެ ޗިޓުގައިވެސް ޝާހިދު ވަނީ ސޮއިކުރައްވާފައި ކަން ފާހަގަކުރެވެއެވެ. ޝާހިދު ވިދާޅުވި ގޮތުގައި އެ މުވައްޒަފު ވަކި ކުރީ ދެ ރައީސުންނަށް ފާޑު ކިޔައިގެން ނޫންކަމަށާއި ނަމަވެސް ކުންފުނީގެ ކޯޑް އޮފް ކޮންޑަކްޓާއި ހިލާފު ވެގެން ކަމަށެވެ.
