ހޯމް މިިނިސްޓަރު ވިދާޅުވާ އެއްޗަކުން "ކައިވެނި" ރޫޅިގެން ނުވާނެ: މޫސަ

ހޯމް މިިނިސްޓަރު އިމްރާން އަބްދުﷲ ވިދާޅުވާ އެއްޗަކުން "ކައިވެނި" ރޫޅާލައިގެން ނުވާނެ ކަމަށާއި އޮޅުމެއް އޮތިއްޔާ ސާފް ކޮށްދިނުމަށް މަޖިލީހުގެ ކުރީގެ ނައިބް ރައީސް މޫސާ މަނިކު ވިދާޅުވެއްޖެއެވެ.

Ads by STELCO

މޫސަ މިހެން މި ވިދާޅުވީ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު އަދާލަތު ޕާޓީއަށާއި ހޯމް މިނިސްޓަރު އިމްރާން އަބްދުﷲ އަށް ފާޑު ވިދާޅުވެ ދެއްކެވި ވާހަކައަށް އަދާލަތުގެ ޚާރިޖީ ގުޅުންތަކާ ބެހޭ ކޮމިޓީގެ ރައީސް ޝިދާތާ ޝަރީފް ރައްދު ދެއްވުމާ ގުޅިގެން ސަރުކާރު ކޯލިޝަންގައި ހިމެނޭ ދެ ޕާޓީގެ ދެމެދުގައި ނުތަނަވަސްކަން އުފެދިފައި ވަނިކޮށެވެ.

އެގޮތުން މޫސަ ކުރެއްވި ޓްވީޓެއްގައި ވިދާޅުވީ މަޖިލީހުގެ އެތެރޭގެ މައްސަލަތައް މިހާތަނަށްވެސް މަޖިލީހުގެ ކޮމެޓީން ބަލާފަ ޖިނާއީ މައްސަލަ ފޮނުވަނީ ފުލުހަށް ކަމަށެވެ. އެކަމަކު މިފަހަރު ތަފާތަކީ ރިޔާސަތުވެސް ކޮމެޓީއަށް ހާޒިރުކުރަންޖެހިފަ އޮއްވާ މިނިސްޓަރު އިމްރާނަށް މާ ކުރިން އެ މައްސަލަ ބައްލަވާނެ ކަމަސް ބުނެވުން ކަމަށެވެ.

ގާނޫނުއަސާސީ އިސްލާހު ކުރުމަށް މިދިޔަ ހޯމަ ދުވަހު މެންދަމު ބޭއްވި ޖަލްސާ ހޫނުވެ ހަމަނުޖެހުން ހިނގި މައްސަލަ ބަލައި ގާނޫނީ ފިޔަވަޅު އެޅުމަކީ ފުލުހުންގެ މައްޗަށް އޮތް ގާނޫނީ ވާޖިބެއް އިމްރާން ވަނީ ވިދާޅުވެފައެވެ.

އެކަމާ ގުޅިގެން ހަސަން ލަތީފު ވިދާޅުވީ ރައްޔިތުންގެ ކުޑަވެސް ތާއީދެއް އެއްވެސް ދާއިރާއަކުން އަދާލަތު ޕާޓީއަށް ލިބި ރައްޔިތުން މަޖިލީހުގެ ގޮނޑިއެއްގެ މިންވަރުވެސް ކާމިޔާބު ކުރެވިފައި ނުވާއިރު، މަޖިލީހުގެ ނިޒާމަށް ހުރަސް އަޅާ މަޖިލީހުގެ އިންތިޒާމުތަކުގެ ތެރެއަށް އަރައިގަތުމުގެ ވިސްނުން ހުރެގެން ނުވާނެ ކަމަށެވެ.

ލަތީފުގެ މިވާހަކައާ ހިތްހަމަޖެހިވަޑައި ނުގަތް ޝިދާތާ ވިދާޅުވީ އަދާލަތު ޕާޓީއަށް މަޖިލިސް ތެރެއިން ގޮނޑިއެއް ނުލިބުނު ނަމަވެސް އަދި އެޕާޓީއަކީ ކިތަންމެ ކުޑަ ޕާޓީއެއް ނަމަވެސް ވެރިކަމަށް އަންނަން ބޭނުންވާ ކޮންމެ ފަހަރަކު ވޯޓުކޮޅު ހަމަ ކޮށްދެނީ އެޕާޓީން ކަމަށެވެ. ނަމަވެސް މިއަދު އެކަން ބޮޑެތި ޕާޓީތަކުން ހަނދާން ނެތިފައިވާ ކަމަށް ޝިދާތާ ވިދާޅުވިއެވެ.

ޝިދާތާގެ މި ވާހަކަ އަށް އެމްޑީޕީ އަދި މަޖިލީހުގެ ރައީސް މުހައްމަދު ނަޝީދު ވަނީ ރައްދު ދެއްވާފައެވެ.

އެގޮތުން ނަޝީދު ކުރެއްވި ޓްވީޓެއްގައި ވިދާޅުވީ އަދާލަތު ޕާޓީ އަކީ އެމްޑީޕީގެ ކޯލިޝަން ޕާޓީއެއްގެ ގޮތުގައި ދެކޭނަމަ، އެމްޑީޕީގެ ޗެއާޕާސަން ހަސަން ލަތީފް ކަންކަމާ އެއްޗެއް ވިދާޅުވީމާ އެ ދެއްކެވި ވާހަކައަށް އަޑު އައްސަވާލެއްވުން ބުއްދިވެރި ކަމަށެވެ.

"އޭޕީ އަށް އަޅުގަނޑު ފުރައިދިން ފޯމު މަދެއް ނުވާނެ އަދި އޭޕީގެ މުސްތަޝާރަށް މިކަން އެނގިވަޑައިގަންނަވާނެ." ޝިދާތާ ޓެގް ކުރައްވާ ނަޝީދު ވިދާޅުވިއެވެ.