މާމިގިލި އެއާޕޯޓް އިންޓަނޭޝަނަލް ކުރަނީ!
އދ. މާމިގިލި އެއާޕޯޓް ވަރަށް އަވަހަށް އިންޓަނޭޝަލް އެއާޕޯޓަކަށް ބަދަލު ކުރެވޭނެ ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ ސަރުކާރު މަސްއޫލިއްތު އަދާ ކުރާ މިންވަރު ބަލާ ކޮމިޓީގައި ދަގެތީ ދާއިރާ މެމްބަރު މުހައްމަދު ނާޒިމް ކުރެއްވި ސުވާލަކަށް ޖަވާބު ދެއްވަމުނެވެ.
މިނިސްޓަރު ނަހުލާ ވިދާޅުވީ މީގެ ކުރީގައި އިންޓަނޭޝަލް އެއާޕޯޓެއްގެ ގޮތުގައި މާމިގިލި އެއާޕޯޓު ބޭނުންކޮށްފައި ވީނަމަވެސް އަނެއްކާވެސް އިންޓަނޭޝަނަލް އެއާޕޯޓަކަށް ބަދަލު ކުރާނަމަ، ސިވިލް އޭވިއޭޝަން ގައިޑްލައިން ތެރެއިން ފޮލޯ ކުރަން ޖެހޭ ކަންތައްތަކެއް ހުރުމާއެކު އެ ކަންތައްތައް ފޮލޯ ކުރަމުން ގެންދާކަމުގަ އެވެ.
އެގޮތުން ސިވިލް އޭވިއޭޝަންގެ ގައިޑްލައިންތަކާއި އެއްގޮތަށް ކަންކަން ކުރުމަށް ފަހު ރާއްޖޭގެ ފަތުރުވެރިކަން އަލުން ހުޅުވާލެވޭ އިރު، އެގޮތަށް އެދިފައިވާ ހުރިހާ އެއާޕޯޓެއް ވެސް އިންޓަނޭޝަލް ކުރެވޭނެ ކަމަށް މިނިސްޓަރު ވިދާޅުވި އެވެ.
"އަވަސް" ނޫހަށް ދެއްވި އިންޓަވިއުއެއްގައި ވިލާ އެއާގެ މެނޭޖިން ޑިރެކްޓަރު އަބްދުﷲ ނާޝިދު ވިދާޅުވީ މާމިގިލީގައި ހިންގާ އެއާޕޯޓަށް އިންޓަނޭޝަނަލް ފްލައިޓްތައް ޖެއްސުމަށާއި ފްލައިމީން ރާއްޖޭން ބޭރަށް ދަތުރު ފަށަން ސިވިލް އޭވިޝަން އޮތޯރިޓީގެ ހުއްދައަށް އެދިފައި ވަނީ މިދިޔަ މަހުގެ 19 ވަނަ ދުވަހުގައި ކަމަށެވެ. އަދި ރާއްޖޭގެ ވައިގެ ދަތުރުތައް ހުޅުވާލައި މި ކަމަށް ހުއްދަ ދިނުމާއެކު ރާއްޖޭން ބޭރުން މާމިގިއްޔަށް އިންޓަނޭޝަނަލް ފްލައިޓް ޖައްސަން ފަށާނެ ކަމަށެވެ.
