އައިޖީއެމްއެޗްގައި ކޮވިޑަށް ޓެސްޓްކުރާ މެޝިނެއް ހަލާކުވެެއްޖެ
އައިޖީއެމް ހޮސްޕިޓަލްގައި ކޮވިޑް-19 އަށް ޓެސްޓް ކުރުމަށް ހުރި ދެ މެޝިންގެ ތެރެއިން އެއް މެޝިން ހަލާކުވެފައިވާ ކަމަށް ނޭޝަނަލް އެމަޖެންސީ އޮޕަރޭޝަންސް ސެންޓަރ(އެންއީއޯސީ)ން ބުނެފި އެވެ.
އެންއީއޯސީގެ ތަރުޖަމާން މަބުރޫކް އަޒީޒް ރޭ ވިދާޅުވީ ކޮވިޑަށް ޓެސްޓް ކުރެވޭ ދެ މެޝިނެއް އައިޖީއެމް ހޮސްޕިޓަލްގައި ހުރި ކަމަށާއި ނަމަވެސް މިވަގުތު އެއް މެޝިން ހަލާކުވެފައިވާ ކަމަށެވެ.
"މެޝިން ރަނގަޅު ކުރުމަށް ބޭނުންވާ ބައިތައް އޯޑަރުކުރުމުގެ މަސައްކަތް އައިޖީއެމްއެޗުން ދަނީ ކުރަމުން،" މަބުރޫކް ވިދާޅުވި އެވެ.
މީގެ ކުރިން ކޮންމެ ދުވަހަކު 700 ސާމްޕަލް ޓެސްޓް ކުރުމުގެ ގާބިލްކަން އެ ހޮސްޕިޓަލުގައި ހުރިނަމަވެސް މިހާރު އެ އަދަދު ވަނީ 450-500 އާ ދެމެދަށް ދަށްވެފައި ކަމަށް މަބުރޫކް ވިދާޅުވި އެވެ.
މަބުރޫކް ވިދާޅުވީ އެއް މެޝިން ހަލާކުވިނަމަވެސް މިހާތަނަށް ކޮންމެ ދުވަހަކު ޓެސްޓް ކުރަމުން އަންނަ މިންވަރަށް ޓެސްޓް ކުރެވޭނެ ކަމަށެވެ.
އައިޖީއެމް ހޮސްޕިޓަލްގެ އިތުރުން ކޮވިޑަށް ޓެސްޓް ކުރެވެނީ އޭޑީކޭ ހޮސްޕިޓަލާއި ފުލުހުންގެ ލެބުންނެވެ. ފުލުހުންގެ ލެބުން 145 ސާމްޕަލް ޓެސްޓް ކުރެވެ އެވެ.
އޭޑީކޭއިން ޓެސްޓެއް ކޮށްދެނީ 675 ރުފިޔާއަށް ކަމަށް އެންއީއޯސީން ވަނީ ބުނެފަ އެވެ. އެ ހޮސްޕިޓަލުގައި ދުވާލަކު 500 ސާމްޕަލް ޓެސްޓް ކުރެވެއެވެ. ނަމަވެސް މިހާތަނަށް އެ އަދަދަށް އެެއްވެސް ދުވަހަކު އެ ހޮސްޕިޓަލުން ޓެސްޓް ކޮށްފައެއް ނުވެ އެވެ.
Ads by STO
