އިންޖީނު ހުއްޓި، ފަރަށް އެރި ދޯންޏެއް ދިޔަވަނިކޮށް ސަލާމަތް ކޮށްފި
މާލެއިން މުދާ ހިފައިގެން ގއ. ގެމަނަފުއްޓަށް ދަތުރުކުރަމުން ދިޔަ ދޯންޏެއްގެ އިންޖީނު ހުއްޓި ފަރަށް އަރާފައި ވަނިކޮށް ސަލާމަތް ކޮށްފިއެވެ.
"ސައުތު އެކްސްޕްރެސް" ނަމަކަށް ކިޔާ މި ބޯޓެއް އިންޖީނު ހުއްޓި ގއ. ދާންދޫ ކައިރި އޮންނަ ވޮޑުމުލާ ކަނޑާ ދިމާލަށް ފަރަކާއި ކައިރިވަމުން ދަނިކޮށް އެ ދޯނި ކަފު ޖަހަގެން ފަރާއި ދުރުކޮށް ސަލާމަތް ކުރީ ގެމަނަފުށީ "ޑެއިޒީ" ނަމަކަށް ކިޔާ މަސް ދޯންޏަކާއި ދާންދޫ "އޯސަން ކިންގް" ނަމަކަށް ކިޔާ މަސް ދޯންޏެކެވެ.
މަސްވެރިންގެ މައުލޫމާތު ގެނެސްދޭ ޓްވިޓައި އަދި ފޭސްބުކް އެކައުންޓް "މޯލްޑިވްސް ފިޝަމަން" އިން ބުނެފައިވާ ގޮތުގައި އެ ބޯޓު ފަރާ ދުރުކުރި އިރު ބޯޓުގެ ފަހަށްކޮޅު ވަނީ ފަރަށް އަރާފައެވެ.
އެ ޕޭޖުން ބުނީ ބޯޓްގެ އިންޖީނު ހުއްޓުނީ ބޯޓުން ވެއްޓުނު ވަލެއް ބުރަފަތީގައި އޮޅިގެން ކަމަށެވެ. ރޫމް ދިޔަ ވެއްޖެ ކަމަށާއި، ބޯޓްގެ ތިން ޕަންޕްގެ ތެރެއިން ދެ ޕަންޕް ޖައްސައިގެން ލޮނުގަނޑު ކޮންޓްރޯލް ކުރެވެނީ ހަމަ ކިރިޔާ ކަމަށެވެ.
މީގެ އިތުރުން ބޯޓްގެ ބަނޑުފިލާއިން 5 ފޫޓްގެ ތަނެއް ހަލާކުވެ، ދިޔަވަމުންދާތީ މަސްދޯނީގެ ޑައިވަރުން ދަނީ މަސައްކަތް ކުރަމުން ކަމަށާއި، މިހާރު އިތުރު ޕަންޕު ބޯޓަށް އަރުވައި ދިޔަ ހިއްކުމުގެ މަސައްކަތް ކުރަމުންދާ ކަމަށްވެސް އެ މީހުން ވަނީ ބުނެފައެވެ.
މި ހާދިސާގައި ބޯޓްގައި ހުރި މުދަލަށް ގެއްލުންވެސް ލިބުނު ނަމަވެސް އެއްވެސް ފަޅުވެރިއަކަށް ގެއްލުން ނުވާ ކަމަށް މައުލޫމާތު ލިބެއެވެ.
ދެ ދޯނީގެ މަސައްކަތުން މިހާރު އެ ބޯޓުގެ ދިއަވުން ވަނީ ކޮންޓްރޯލް ކޮށްފައެެވެ. އަދި މަސް ދޯނީގައި ކަފު ޖަހައިގެން ގެންމަނަފުއްޓަށް ގެންދަން ތައްޔާރުވަމުންދާ ކަމަށް އެ މީހުން ބުނެއެވެ.
