ހައިކޯޓުން ހަސަން ސައީދުގެ ޖަލު ހުކުމް ބާތިލް ކޮށްފި
ހައި ކޯޓުން ފުރަތަމަ ފަހަރަށް ލައިވްކޮށް ބޭއްވި ޝަރީއަތުގައި، ކުރީގެ ޖުޑީޝަލް އެޑްމިނިސްޓްރޭޓާ ހަސަން ސައީދުގެ މައްޗަށް އިއްވާފައިވާ ހަތަރު މަހުގެ ޖަލު ހުކުމް މިއަދު ބާތިލްކޮށްފި އެވެ.
ގާނޫނު ހިންގަން ހުރަސް އެޅުމުގެ ދައުވާ ސާބިތުވާ ކަމަށް ނިންމައި، ހަސަން ސައީދުގެ ހަތަރު މަހާއި 24 ދުވަހަށް ޖަލަށްލާން ކުރިމިނަލް ކޯޓުން ހުކުމް ކުރީ 2018 ވަނަ އަހަރު އެވެ. އޭނާގެ މައްޗަށް އެދައުވާ އުފުލީ ސުޕްރީމް ކޯޓުގެ 1 ފެބްރުއަރީގެ އަމުރަށް ފަހު ފުލުހުން އޭނާ ހޯދަން އިއުލާން ކުރުމުން ފުލުހަށް ހާޒިރުނުވި ކަމަށް ބުނެ އެވެ.
މިއަދު އެ ހުކުމް ބާތިލްކުރި އިރު، އެ ހުކުމް ތަންފީޒުކޮށް، ނިމި 2018 ވަނަ އަހަރު ވަނީ އޭނާ ވަނީ މިނިވަންވެފަ އެވެ.
އެ މައްސަލަ ހަސަންގެ ފަރާތުން ހައި ކޯޓުގައި އިސްތިއުނާފް ކުރުމުން ހައި ކޯޓުން ހުކުމް އިއްވީ މިއަދު ބޭއްވި ޝަރީއަތުގެ މަޖިލީހުގައި އެވެ. އެ ޝަރީއަތަކީ ފުރަތަމަ ފަހަރަށް ހައިކޯޓުން ކޯޓުން އޮންލައިިންކޮށް ކުރިއަށް ގެންދިޔަ ޝަރީއަތެވެ. އެ ޝަރީއަތް ޔޫޓިއުބް މެދުވެރިކޮށް ހައި ކޯޓުން ލައިވްކޮށް ދެއްކި އެވެ.
ހުކުމުގައި ވަނީ ހަސަން ސައީދުގެ މައްސަލައެއް ބަލަމުންދާކަން ފުލުހުން ނެރުނު ނޫސް ބަޔާނަކުން އިއުލާން ކުރިޔަސް، ތަހުގީގަށް ހާޒިރުވާން އޭނާއަށް އަންގާފައިވާކަން އެނގެން ނެތް ކަމަށެވެ. އަދި ތަހުގީގަށް މީހުން ހާޒިރުވާން އަންގާ އާންމު އުސޫލުގެ ތެރެއިން އެފަދަ އެންގުމެއް އޭނާ އަށް އެންގިކަން ވެސް އެނގެން ނެތް ކަމަށެވެ. އަދި އެންގުމެއް ނެތި އެ މައްސަލާގައި ހަސަންގެ މައްޗަށް ތަހުގީގު ހިންގައި، ދައުވާ އުފުލީ އާންމުކޮށް އަމަލުކުރާ އުސޫލުގެ ތެރެއިން ކަން ދައުލަތަށް ސާފުކޮށް ނުދެވޭ ކަމަށް އެ ހުކުމުގައިވެ އެވެ.
ހުކުމުގައިވާ ގޮތުން އެ ދައުވާ ހަސަންގެ މައްޗަށް ސާބިތު ކުރެވޭނީ އޭނާ ހޯދަން ފުލުހުން އިއުލާން ކުރިކަމާއި އެކަން އޭނާއަށް އެނގިފައިވާ ކަމާއި އެކަން އެނގިހުރެ ހާޒިރު ނުވި ކަމާއި އަދި ހާޒިރުނުވީ ހާޒިރުވުމުގެ ފުރުސަތު އޮވެކަން ދައުލަތުން ސާބިތުކޮށްދެވިގެންނެވެ. އެކަމަކު ދައުލަތުން ހެކިތަކުން އެކަންކަން ސާބިތު ނުވާ ކަމަށް އެ ހުކުމުގައިވެ އެވެ.
ހަސަންއާ ދެކޮޅަށް ހެކިބަސް ދިން މީހުންގެ ހެކިބަސް ސިއްރުން ނެގިއިރު، އެ މީހުންގެ އަދުލުވެރިކަން ދަށު ކޯޓުން ކަށަވަރުކުރި ގޮތް އެނގެން ނެތެވެ. އަދި ޖިިނާއީ އިޖްރާއާތުގެ ގާނޫނު އޮތްގޮތުން ސިއްރުން ހެކިބަސް ނެގެނީ ހެއްކާ ބެހޭ ގާނޫނުގައިވާ ގޮތުގެ މަތިން ކަމަށް ވާއިރު، ހެއްކާ ބެހޭ ގާނޫނުގައި އެފަދަ އެއްވެސް ވާހަކައެއް ބަޔާން ނުކުރާ ކަމަށް ވެސް އެ ހުކުމުގައި ވެއެވެ.
މީގެ އިތުރުން ހަސަން ސައީދުގެ ދިފާއުގައި އޭނާގެ ފަރާތުން ހުށަހެޅުއްވި އޭރުގެ އުއްތަމަ ފަނޑިޔާރު އަބްދުﷲ ސައީދާއި އޭރުގެ ސުުޕްރީމް ކޯޓުގެ ފަނޑިޔާރު އަލީ ހަމީދުގެ ހެކިބަސް ނުނަގަން ދަށު ކޯޓުން ނިންމީ އެކަށީގެންވާ ސަބަބުތަކެއް ބަޔާން ކުރުމެއް ނެތި ކަމަށެވެ. އަދި ދިފާއީ ހެކިންގެ ބަސް އަޑުއެހުމެއް ނެތި އެ މީހުން ހާޒިރު ނުކުރަން ނިންމީ ސުޕްރީމް ކޯޓުން ކުރިން ނިންމާފައިވާ ނިންމުންތަކާ ހިލާފަށް ކަމަށް ވެސް ހުކުމުގައިވެ އެވެ.
އެކަންކަން ފާހަގަކޮށް، އެ ހުކުމުގައިވަނީ ހަސަންގެ މައްޗަށް ދަށު ކޯޓުން ކުރި ހުކުމް ސައްހަ ނޫން ކަމަށް އެ މައްސަލަ ހައި ކޯޓުގައި ބެއްލެވި ތިން ފަނޑިޔާރުންނަށް ވެސް އެއްބަސްވެވޭތީ އެ ހުކުމް ބާތިލް ކުރާ ކަމަށެވެ.
އެ މައްސަލަ ބެއްލެވީ ފަނޑިޔާރު ހުސައިން މަޒީދާއި ފަނޑިޔާރު މުހައްމަދު ފައިސަލްގެ އިތުރުން އިސް ފަނޑިޔާރު ޝުޖާއު އުސްމާނެވެ. އެ ބެންޗުގެ ރިޔާސަތު ބެލެހެއްޓެވީ ފަނޑިޔާރު މަޒީދެވެ.
ގާނޫނު ހިންގަން ހުރަސް އެޅުމުގެ ދައުވާއެއްގެ އިތުރުން ރިޝްވަތުގެ ދައުވާއެއް ވެސް ހަސަންގެ މައްޗަށް ދައުލަތުން ކުރި އެވެ. އެކަމަކު ކްރިމިނަލް ކޯޓުން ފަހުން ވަނީ އެ ދައުވާ ބާތިލްކޮށްފަ އެވެ.
