ދިޔަވަމުންދިޔަ ދެ ޑިންގީއަކަށް އެމްއެންޑީއެފުން އެހީތެރިކަން ފޯރުކޮށްދީފި
ގދ. ހައުޑިގަލާ އިން ފުރައިގެން އެއަތޮޅު ތިނަދޫއަށް ދަތުރުކުރި ދެ ޑިންގީއަކަށް ދިޔަވާތީ އެމްއެންޑީއެފުން އެހީތެރިކަން ފޯރުކޮށްދީފި އެވެ.
އެމްއެންޑީއެފުން ބުނީ ހައުޑިގަލާ އިން ފުރައިގެން ތިނަދޫއަށް ދަތުރުކުރި ދެ ޑިންގީއަކަށް ދިޔަވާތީ، އެދެޑިންގީގައި ތިބި މީހުން އެމްއެންޑީއެފްގެ އެހީތެރިކަމާއެކު ތިނަދޫއަށް ގެންގޮސްފައިވާ ކަމަށެވެ.. އެގޮތުން ހައުޑިގަލާއިން ތިނަދޫއަށް ދަތުރުދިޔަ "ރަންދިޔެ" ޑިންގީގައި ހަ މީހުން ތިބިކަމަށާއި "ކުރި" ޑިންގީގައި ފަސް މީހުން ތިއްބެވެ. އެއްވެސް މީހަކަށް އަނިޔާއެއް ލިބިފައިނުވާ ކަމަށް އެމްއެންޑީއެފުން ބުންޏެވެ.
މި ހާދިސާގެ މައުލޫމާތު ލިބިފައިވަނީ މިއަދު ހަވީރު 15:58 ހާއިރު ކަމަށްވެސް އެމްއެންޑީއެފުން ބުންޏެވެ. އަދި އެމީހުން ތިނަދޫއަށް ގެންގޮސްފައިވަނީ ހަވީރު 5:15 ހާއިރު ކަމަށެވެ.
ރާއްޖޭގެ މޫސުން މިދުވަސް ވަރު ގޯސްވުމާއި ގުޅިގެން ކަނޑުމަތީގެ ހާދިސާތައް ދަނީ އިތުރުވަމުންނެވެ. އެކަމާ ގުޅިގެން އެމްއެންޑީއެފުން ބުނީ މިދުވަސްވަރު މޫސުން ގޯސްވުމާއި ގުޅުގެން ކަނޑުމަތީގެ ތަފާތު ހާދިސާތައް ހިނގަމުންދާ ކަމުގެ މައުލޫމާތު ލިބޭ ކަމަށެވެ. އެހެން ކަމުން ކަނޑު ދަތުރު ކުރައްވާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް އިލްތިމާކުރާ ކަމަށެވެ.
މޫސުން ގޯސްވެ، މޫސުމާބެހޭ މައި އިދާރާ، މެޓް އޮފީހުން ވަނީ ރާއްޖޭގެ ބޮޑު ބަޔަކަށް ޔެލޯ އެލާޓްވެސް ނެރެފަ އެވެ. ޔެލޯ އެލާޓް ނެރެފައިވަނީ ހއ. އަތޮޅުން ތ. އަތޮޅާއި ދެމެދުގެ ރަށްތަކަށެވެ.
މެޓް އޮފީހުން ބުނެފައިވާ ގޮތުގައި މިސަރަޙައްދުތަކުގައި ހިމެނޭ ރަށްތަކަށް އާންމު ވައި ގަޑިއަކު 25 މޭލާއި 30 މޭލުގެ ބާރު މިނުގައި ޖެހެމުންދާއިރު ވިލާގަނޑުގައި ގަޑިއަކު 55 މޭލަށް ވައިގަދަވެ ކަނޑުތައް ވެސް ގަދަވާނެ އެެވެ.
