11 އަހަރުގެ ކުއްޖާ ރޭޕް ކުރި މައްސަލައިގައި ތުހުމަތުވާ މީހާގެ ބަންދަށް ހަތް ދުވަސް!
މާލޭގައި އުމުރުން 11 އަހަރުގެ ކުޑަ އަންހެން ކުއްޖަކު ރޭޕްކުރި މައްސަލައިގައި ތުހުމަތުވާ ފަރާތުގެ ބަންދަށް ހަތް ދުވަސް ކްރިމިނަލް ކޯޓުން ޖަހައިފިއެވެ.
މިމައްސަލައާއި ގުޅިގެން ރޭގެ ވަގުތެއްގައި ކޯޓު އަމުރެއްގެ ދަށުން، އުމުރުން 38 އަހަރުގެ ފިރިހެނަކު ހައްޔަރު ކޮށްފައިވެއެވެ.
ކުޑަކުއްޖަކު ރޭޕް ކުރި ތުހުމަތުގައި ހައްޔަރުކުރި މީހާގެ ޝަރީޢަތް ނިމެންދެން އޭނާ ބަންދުގައި ބަހައްޓައި ދިނުމަށް ކޮމިޝަނަރ އޮފް ޕޮލިސް މުޙައްމަދު ޙަމީދު ވަނީ ޕްރޮސެކިއުޓާރ ޖެނެރަލްގެ އަރިހުން މިއަދު އެދިލައްވާފައެވެ. ނަމަވެސް ކްރިމިނަލް ކޯޓުން އެފަދައިން ނިންމަވާފައެއް ނުވެއެވެ.
ފުލުހުންގެ މީޑިއާ އޮފިޝަލު ވިދާޅުވީ، މިމައްސަލައިގައި ހައްޔަރު ކުރެވުނު ފަރާތުގެ ބަންދާއިމެދު ގޮތެއް ނިންމުމަށް މިއަދު ކޯޓަށް ހާޒިރު ކުރުމުން، ހޯމް މިނިސްޓްރީން ކަނޑައަޅާ ތަނެއްގައި ބަންދުގައި ބަހައްޓައިގެން ތަހުގީގު ކުރިއަށް ގެންދިޔުމަށް ހަތް ދުވަހުގެ މުއްދަތެއް ދީފައިވާ ކަމަށެވެ.
އުމުރުން 11 އަހަރުގެ އެކުޑަ ކުއްޖާ ރައްކާތެރި މާހައުލަކަށް މިހާރު ބަދަލު ކޮށްފައިވާއިރު އެކުއްޖާގެ ރައްކާތެރިކަން ކަށަވަރު ކޮށްދިނުމަށްޓަކައި ކަމާއިބެހޭ ފަރާތްތަކާއި ގުޅިގެން މަސައްކަތް ކުރަމުން އަންނަ ކަމަށް ވެސް ފުލުހުން ވިދާޅުވެފައިވެއެވެ.
