މި ލިބުނު ލުޔާއެކު އިތުރު ބަންދަކަށް ނުގޮސް މިންޖުވޭތޯ ބަލަމާ ހިނގާ: މޫސަ
ލޮކްޑައުނުން ލިބުނު ލުޔާއެކު އިތުރު ބަންދަކަށް ނުދިއުމުގެ ބާރު އޮތީ ރައްޔިތުންގެ އަންމަތީގައިކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އަދި ކުރީގެ އެމްޑިޕީގެ ޗެއާޕާސަން ރީކޯ މޫސާ މަނިކު ވިދާޅުވެއްޖެ އެވެ.
ކޮވިޑް-19 އާ ގުޅިގެން މާލޭ ސިޓީގައި އުޅޭ ފަރާތްތަކަށްވެސް ފޭސް ދޭއްގެ ދަށުން ލުއިތަކެއް ދިނުމާއެކު މޫސަ މިއަދު ކުރެއްވި ޓްވީޓްގައި ވިދާޅުވީ އެންމެން ގުޅިގެން މަސައްކަތް ކުރީ މި ބަލި މަޑުކަމުން އަރަގަނެ ކުރީގެ ހާލަތަށް ރުޖޫއަވުމަށްކަމަށެވެ.
އެހެންކަމުން ލޮކްޑައުނަށް ލުއި ލިބުނު ނަމަވެސް އިތުރު ފުރަ ބަންދަކަށް ދާން ބޭނުން ނުވާ ނަމަ ދީފައިވާ އިރުޝާދުތަކަށް ތަބާވެ އަމަލުކުރުން މުހިންމުކަމަށް މޫސަ ވިދާޅުވި އެވެ.
ސިއްޙީ ޚިދުމަތްތެރިންނާ ސަރުކާރާ ރައްޔަތުންވީ ޤުރުބާނީއަކީ މިބަލިންއަރައިގަނެ ކުރިންއޮތް ދިރިއުޅުމަށް ޤައުމު އަނބުރާގެންދިއުންކަމަށްވާއިރު މިލިބުނު ލުޔާއެކު އަދިވެސް އިތުރު ބަންދަކަށްނުގޮސް މިންޖުވެވޭތޯ ބަލަމާހިނގާ. އެކަންއޮތީ އަޅުގަނޑުމެންގެއަތްމަތީ.
— Reekomoosa (@ReekoMoosa) June 15, 2020
ޑިރެކްޓާ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ރޭ ނެރުއްވި އެންގުމެއްގައި ވިދާޅުވީ އާންމު ސިއްހަތު ރައްކާތެރިކުރުމުގެ ގާނޫނުގެ 34 ވަނަ މާއްދާގެ ދަށުން ޑިރެކްޓާ ޖެނެރަލް އޮފް ޕަބްލިކް ހެލްތަށް ލިބިދޭ ބާރުގެ ދަށުން މިދިޔަ މަހުގެ 29 ވަނަ ދުވަހު ނެރުނު އެންގުމުގައިވާ ފިޔަވަޅުތައް މާދަމާ އިން ފެށިގެން ބާތިލުވާނެ ކަމަށެވެ.
