ސުޝާންތުގެ މަރުގެ ތަހުގީގު: ރީއާ އާއި ސުވާލުކޮށްފި، ގޭތެރެއިން ފަސް ޑައިރީ ވެސް ފެނިއްޖެ!
ބޮލީވުޑްގެ ޚަބަރުތަކަށް ބަލާއިރު އަދިވެސް އެންމެ ފާހަގަ ކޮށްލެވެނީ ކާމިޔާބު ބޮލީވުޑް އެކްޓަރ ސުޝާންތު ސިންގް ރާޖްޕޫތު މަރުވެގެން ދިޔަ ޚަބަރެވެ.
އެމުރުން އެންމެ 34 އަހަރުގެ އެޒުވާން އެކްޓަރު އޭނާގެ އަމިއްލަ ފުރާނަ ނަގާލާފައިވަނީ މިމަހުގެ 14 ވަނަ ދުވަހުގައެވެ. ބާންޑްރާގައި އޭނާ ދިރިއުޅޭ އެޕާޓްމަންޓުގައި އަމިއްލައަށް މަރުވެފައި ހުއްޓާ ފެނިފައިވަނީ އެގޭގެ މަސައްކަތު މީހަކަށެވެ.
ސުޝާންތުގެ މަރާއެކު ބޮލީވުޑާއި ބެހޭގޮތުން ކުރިން ނޭނގޭ އެތައް ކަމެއް މިވަނީ ހާމަވެފައެވެ.
ފިލްމީ އެދާއިރާގައި ބޮޑެތިމީހުންގެ ދަރިންނަށްދޭ އިސްކަން، ބުރަ މަސައްކަތުން ދާއިރާގައި ފައިތިލަ ސާބިތު ކުރަން އުޅޭ މީހުންނަށްވުރެ ބޮޑުކަން ދުނިޔޭގައި ހުރިއިރު ސުޝާންތު ވަނީ ފާހަގަކޮށްފައެވެ. އޭގެ ސަބަބުން ބޮލީވުޑްގެ ބައެއް ބޮޑެތި ޕްރޮޑަކްޝަން ހައުސްތަކުން ވަނީ ސުޝާންތު ބޮއީކޮޓް ކުރުމުގެ އިތުރުން އޭނާގެ ކެރިއަރަށް ވެސް ނުފޫޒު ފޯރުވާފައެވެ.
ސުޝާންތު ބޯއިކޮޓް ކުރި ޕްރޮޑަކްޝަން ހައުސްތަކުގެ ތެރޭގައި ހިމެނެނީ ކަރަން ޖޯހަރްގެ "ދަރްމާ ޕްރޮޑަކްޝަންސް" އާއި "ޔަޝް ރާޖް ޕްރޮޑަކްޝަންސް" ގެ އިތުރުން ސަލްމާންޚާންގެ "ސަލްމާންޚާން ފިލްމްސް" އާއި އެކްތާ ކަޕޫރުގެ "އެކްތާ ޕްރޮޑަކްޝަންސް" އެވެ.
ހަ މަސް ދުވަހުގެ ތެރޭގައި ސުޝާންތަށް ލިބުނު ހަތް ފިލްމުން އޭނާ ދުރުކޮށް އެހެން ފިލްމުތަކުގެ މަސައްކަތް ގަސްތުގައި ލަސްކުރި ކަމަށް ވެސް ރިޕޯޓުތަކުން ބުނެއެވެ. ބެލެވޭ ގޮތުގައި ސުޝާންތު ނަފްސާނީ ބަލީގެ ޝިކާރައަކަށްވީ ބޮލީވުޑްގައި އޭނާއާއިމެދު މިފަދަ ތަފާތުކުރުން ތަކާއި ބޭއިންސާފުން ޢަމަލު ކުރުމުންނެވެ. އެހެންކަމުން އޭނާގެ މަރުގެ ޒިންމާ މިހާރު ވަނީ ކަރަން ޖޯހަރާއި، ސަލްމާން ޚާން، ސަންޖޭ ލީލާ ބަންސާލީ އަދި އެކްތާ ކަޕޫރުގެ އިތުރުން ހަތަރު މީހެއްގެ މައްޗަށް އުފުލާފައެވެ.
ބާންޑްރާ ފުލުހުން އަދިވެސް މިމައްސަލަ ތަހުގީގު ކުރަމުން އަންނައިރު، އިއްޔެ ފުލުސް އޮފީހަށް ސުޝާންތުގެ ލޯބިވެރިޔާ ކަމަށް އަޑުއަރާފައިވާ ރިއާ ޗަކްރަބޯތީ ވަނީ ހާޒިރުކޮށް ނުވަ ގަޑިއިރު އެތަނުގައި ބައިންދާ ބަޔާން ނަގާފައެވެ.
މީގެއިތުރުން، ސުޝާންތު މަރުވި ގެއިން އޭނާގެ ފަސް ޑައިރީއެއް ވެސް ފެނިފައިވާ ކަމަށާއި އެތަކެތިވެސް މިހާރު ތަހުގީގުގައި ބޭނުން ކުރަމުން އަންނަ ކަމަށް ރިޕޯޓުތަކުގައި ބުނެފައިވެއެވެ.
ސުޝާންތުގެ މަރަށްފަހު އިންޑިއާގެ ގިނަ ބަޔަކު ވަނީ އޭނާގެ މަރުގެ ޒިންމާ ނަގަންޖެހޭނެ ކަމަށް ދައުވާ ކޮށްފައިވާ ފަރާތްތަކަށް ނުރުހުން ފާޅުކޮށްފައެވެ. ޚާއްސަކޮށް ކަރަން ޖޯހަރް ދެކެ އިންތިހާއަށް މީހުން ނަފްރަތު ކޮށްފައިވާކަން ވެސް ފާހަގަވެއެވެ.
