ދެ މެޗުން ދެ ބަލި، ތިން ކުޅުންތެރިންނަށް އަނިޔާވުން، އާޓެޓާ ކަރުތާފެނުގައި!
ކޮވިޑް-19ގެ މެދު ކެނޑުމަކަށްފަހު އެނބުރިއައިސް އާސެނަލް ކުޅުނު ދެވަނަ މެޗުންވެސް ބަލިވިއިރު، އަނެއްކާވެސް މުހިންމު ކުޅުންތެރިއަކަށް އަނިޔާވެ ކޯޗު އާޓެޓާގެ ބޮލުގެ ރިހުން ބޮޑުވެއްޖެއެވެ.
އިނގިރޭސި ޕްރިމިއަރ ލީގުގައި ބްރައިޓަން އަތުން އާސެނަލް ބަލިވީ ދޭއް އެކަކުންނެވެ. ފަހަތުން އަރާ ބްރައިޓަން ދެ ލަނޑު ޖެހި މި މެޗުގައި އެޓީމްގެ ފަހު ލަނޑަކީ މެޗުގެ އެންމެ ފަހު ވަގުތުކޮޅުގައި ޖެހި ގޯލެކެވެ.
މި މެޗުން ބަލިވުމުގެ އިތުރުން ކޯޗު އާޓެޓާއަށް ލިބޭނެ އެންމެ ބޮޑު މާޔޫސްކަމަކީ ޓީމްގެ އެންމެ މުހިންމު އެއް ކުޅުންތެރިޔާ ބާންޑް ލެނޯއަށް އަނިޔާވުމެވެ. މިދިޔަ ސީޒަނާއި މި ސީޒަންގައިވެސް މޮޅު ކުޅުމެއް ދައްކަމުން އަންނަ ކީޕަރަށް އަނިޔާވީ ފުރަތަމަ ހާފުގައެވެ. އަށިގަނޑުގައި ލެނޯ ބާލަން ޖެހުނުއިރު މި އަނިޔާގެ ސަބަބުން އޭނާއަށް ދެން މި ސީޒަންގައި ކުޅުމުގެ ފުރަސަތު ކުޑައެވެ.
ލެނޯއަކީ އަލުން ޕްރިމިއަރ ލީގުގެ މެޗުތައް ފެށިފަހުން ކުޅުނު ދެ މެޗުގައި އަނިޔާވި އާސެނަލްގެ ތިންވަނަ ކުޅުންތެރިޔާއެވެ. އޭނާގެ އިތުރުން ޑިފެންޑަރ ޕަބްލޯ މާރީ އަދި މިޑްފިލްޑަރ ގްރަނިތް ޝަކާއަށްވެސް އަނިޔާވެ ގިނަ ދުވަސްތަކަކަށް ކުޅުމާއި ދުރަށްދާން ވަނީ ޖެހިފައެވެ. ޓީމްގެ ފުރަތަމަ އެގާރައިގައި ހިމެނޭ 3 ކުޅުންތެރިއަކަށް އަނިޔާވުމަކީ ބޮޑު ކަންބޮޑުވުމެއްކަމަށް ކޯޗު އާޓެޓާ ވެސް ވަނީ ބުނެފައެވެ.
ބްރައިޓަން އަތުން ބަލިވުމުން އާސެނަލަށް ލިބޭނެ އަނެއް ގެއްލުމަކީ އަންނަ ސީޒަންގައި ޔޫރަޕްގެ މުބާރާތަކުން ފުރުސަތު ހޯދުމުގެ ފުރުސަތު އެޓީމަށް ހަނިވުމެވެ. ޔުއެފާ ޗެމްޕިއަންސް ލީގާއި ޔޫރޮޕާ ލީގުން ފުރުސަތު ލިބެނީ ގަދަ ފަސް ޓީމަށެވެ. އާސެނަލް އޮތީ ކުޅުނު 30 މެޗުން ލިބުނު 40 ޕޮއިންޓާއިއެކު ތާވަލްގެ ދިހަވަނައިގައެވެ. ލީގުގައި ބާކީ އޮތީ 8 މެޗެވެ.
Ads by STO
