ރީތި، ދިގު އިސްތަށިގަނޑެއް ބޭނުންނަމަ މިކަންކަން ކޮށްލާ!
އިސްތަށިގަނޑު ދިގު ކުރުމަކީ ގިނަ ބަޔަކު ވަރަށް ކުރަން ބޭނުންވާ ކަމެކެވެ. ނަމަވެސް ތަފާތު އެކި އެކި އަގުބޮޑު ޕްރޮޑަކްޓްސް ބޭނުން ކޮށްގެން ވެސް ގިނަ ފަހަރަށް އިސްތަށިގަނޑު އޮންނަނީ ދިގު ނުވެފައެވެ. މި ހިމަނާލަނީ އިސްތަށިގަނޑު ދިގުކޮށް، ވަރުގަދަކޮށް ބޭއްވުމަށް ގޭގައި ކުރެވިދާނެ ބައެއް ކަންތައްތަކެވެ.
އިސްތަށިގަނޑުގައި ތެޔޮލުން: ބޮލުގައި ތެޔޮ ލުމަކީ ގިނަ ބަޔަކު ވަރަށް ފޫހިވާ ކަމެކެވެ. ނަމަވެސް ތެލަކީ އިސްތަށިގަނޑަށް ވަރަށް ފައިދާހުރި އެއްޗެކެވެ. ޤަވާޢިދުން އިސްތަށިގަނޑުގައި ކާށި ތެޔޮ ނުވަތަ އާރގަން ތެޔޮ އުނގުޅުމަކީ އިސްތަށިގަނޑު އަވަހަށް ދިގު ކޮށްދޭނެ ކަމެކެވެ. މިގޮތަށް ތެޔޮ އުނގުޅާއިރު އިސްތަށިގަނޑުގެ ބުޑުތަކުގައި ތެޔޮ ލުމަކީ މުޙިއްމު ކަމެކެވެ. ހަފްތާއަކު 3 ފަހަރު އިސްތަށިގަނޑު ދޮވެ ހިއްކުމަށްފަހު ތެޔޮ އުނގުޅަން ހަނދާން ކުރާށެވެ.
އިސްތަށިގަނޑު މަސާޖު ކުރުން: އިސްތަށިގަނޑުގެ ބުޑުތައް މަސާޖު ކުރުމަކީ އިސްތަށިތަކަށް ބޭނުންވާ އަރާމު ލިބި ދިގު ކޮށްދޭނެ ކަމެކެވެ. އެގޮތުން ކޮންމެ ދުވަހަކުވެސް ނިދުމުގެ ކުރިން ހެއަރ ސްޓައިލް ދޫކޮށްލުމަށްފަހު މަދުވެގެން 1 މިނެޓު ވަންދެން މަސާޖު ކޮށްލަން ވާނެއެވެ. މިއީ އަމިއްލައަށްވެސް ކުރެވިދާނެ ކަމެކެވެ.
ފުނާ އެޅުން: ރެއަކާ ދުވާލު މެދުވެގެން 3 ފަހަރު އިސްތަށިގަނޑުގައި ފުނާ އަޅާށެވެ. ފުނާ އަޅާއިރު ގޮށް ޖެހިފައިވާނަމަ ތިރިން ފެށިގެން މައްޗަށް ފުނާ އަޅާށެވެ. މިއީ އިސްތަށިގަނޑަށް ލިބޭ ގެއްލުން ކުޑަކޮށްދީ އިސްތަށިގަނޑު ދިގުވުމަށް އެހީ ވެދޭނެ ކަމެކެވެ.
ބޮލުގައި އަލުވި އުނގުޅުން: އަލުވިއަކީ އިސްތަށިގަނޑު ދިގުވުމަށް ވަރަށް ބޮޑު އެހީއެއް ވެދޭ ކާނާއެކެވެ. ބޮލުގައި އަލުވި ބޭނުންކުރުމަށްއާދައިގެ ތިން އަލުވި މިކްސަރަށް އަޅާ ރަނގަޅަށް މިކްސް ކޮށްލާވެ. އެއަށްފަހު އަލުވިން ނުކުމެފައި ހުރި ފެނާއި، ކުކުޅު ބިހަކާއި، ކުޑަ ފެންފޮދެއް އަދި ސައިސަމުސަލެއްގެ މާމުއި އަޅާ އެއްކޮށްލާށެވެ. ހުރިހާ އެއްޗެއް ރަނގަޅަށް އެއްވުމުން، ބޯ ތެތް ކޮށްލުމަށްފަހު ބޮލުގައި އުނގުޅާށެވެ. ބޮލުގައި ޕޭސްޓް އުނގުޅުމަށްފަހު 30 ވަރަަކަށް މިނެޓް ބެހެއްޓުމަށްފަހު ތާފަނާ ފެނުން ރަނގަޅަށް ބޯ ދޮވެލާށެވެ.
ފިޔާ މާސްކެއް: އަލުވި އެކޭ އެއްފަދައިން ފިޔައަކީ ވެސް އިސްތަށިގަނޑު ދިގުކޮށް ދިނުމަށް އެހީވެދޭ އެއްޗެކެވެ. ބޮލުގައި ފިޔާ އުނގުޅުމުގެ ސަބަބުން އިސްތަށިގަނޑު ބޯވެ، ދިގުވުމަށް އެހީތެރިވެދޭ ކަމަށް ވެއެވެ. ފިޔާ މާސްކު ތައްޔާރުކޮށްލުމަށް ހަތަރު ބޮނޑި ލޮނުމެދާއި، 2 ފޮނިތޮށްޓާއި ފިޔައެއް ކުދިކޮށް ކޮށާލުމަށްފަހު އެކުގައި ފެނުކައްކާށެވެ. އެއަށްފަހު ފެންގަނޑު ފިނިކޮށްލަން ބަހައްޓާލާށެވެ. ކުޑަކޮށް ހިހޫ ވެލުމުން “ރިހަ” އެއް ގޮތަށް ހުރި ޕޭސްޓް ގަނޑު ބޮލުގައި އުނގުޅާށެވެ. 15 މިނެޓް ފަހުން އިސްތަށިގަނޑު ރަނގަޅަށް ދޮވެލާށެވެ. އެހެން ނަމަވެސް ބޯ ދޮންނަ ކޮންމެ ފަހަރަކު މި ޕޭސްޓް ބޮލުގައި އުނގުޅަން ވާނެއެވެ. އޭރުން އިސްތަށީގެ ކޮޅުތައް ހަލާކުވުމުން ދުރުކޮށްދީ، އިސްތަށިގަނޑު ދިގުވުމަށް އެހީވެދީ އިސްތަށިގަނޑަށް ބޭނުންވާ މާއްދާތައް ލިއްބައިދޭނެއެވެ.
