އއ. އަތޮޅުގައި އަވަށްޓެރި ފުލުހުންގެ ހިދުމަތް ތައާރަފް ކުރުމާ ގުޅޭގޮތުން މަޝްވަރާ ބައްދަލުވުންތަކެއް ބާއްވައިފި
އއ. އަތޮޅުގެ ރަށްރަށުގައި އަވަށްޓެރި ފުލުހުންގެ ހިދުމަތް ފެށުމަށް ވަމުންދާ ތައްޔާރީތަކުގެ ތެރެއިން އއ. އަތޮޅު ކައުންސިލާއި އއ. އަތޮޅު ރަށްރަށުގެ ކައުންސިލް މެމްބަރުންނާއި ސަރުކާރު މުއައްސަސާތަކާއި ކުލަބް ޖަމްޢިއްޔާތަކާއެކު މަޝްވަރާ ބައްދަލުވުންތަކެއް ބާއްވައިފިއެވެ.
މި ފެބްރުއަރީ މަހުގެ 1 ން 2 އަށް ބޭއްވި މި ބައްދަލުވުންތަކަކީ 2019-2024 އަށް ކަނޑައަޅާފައިވާ ފުލުހުންގެ ސްޓްރެޓީޖިކް ޕްލޭންގައި ހިމެނޭ “ނެއިބަރހުޑް ޕޮލިސިންގ މޮޑެލް” ނުވަތަ “އަވަށްޓެރި ފުލުހުންގެ ހިދުމަތް” އަތޮޅުތަކަށް ތައާރަފް ކުރުމަށް ޓަކައި ކުރަމުންދާ މަސައްކަތްތަކުގެ ތެރެއިން އއ. އަތޮޅުގައި މި ހިދުމަތް ފެށުމަށް ވާންޖެހޭ ތައްޔާރީތަކާ ގުޅޭގޮތުންނާއި ކަމާގުޅުންހުރި މައުލޫމާތުތައް ހިއްސާކުރުމުގެ ގޮތުން ބޭއްވި ބައްދަލުވުންތަކެކެވެ.
އެގޮތުން އއ. އަތޮޅުގައި ފުލުހުންގެ ހިދުމަތް ގާއިމް ކުރެވިފައިވާ ރަސްދޫ، ހިމަންދޫ، އުކުޅަސް އަދި މަތިވެރިއަށް ޒިޔާރަތްކޮށް އެރަށުގެ ރައްޔިތުންގެ ކަންބޮޑުވުންތައް ބަލައި، އެރަށްރަށުގެ ކައުންސިލްތަކާއި ސަރުކާރު މުއައްސަސާތަކާއި ކުލަބް ޖަމްޢިއްޔާތަކާއެކު ބޭއްވި ބައްދަލުވުންތަކުގައި އަވަށްޓެރި ފުލުހުންގެ ހިދުމަތް ކުރިއަށް ގެންދިއުމަށް ހަމަޖެހިފައިވާ ގޮތާ ގުޅޭގޮތުން މައުލޫމާތު ދީފައިވެއެވެ. އަދި ފުލުހުންނާ ގުޅިގެން މަސައްކަތްކުރުމަށް ކުރެވިދާނެ ކަންކަމާއި އަަވަށްޓެރި ފުލުހުންގެ ހިދުމަތް ތަރައްގީކޮށް ހަރުދަނާ ގޮތެއްގައި ކުރިއަށް ގެންދިއުމަށް ހިޔާލު ހޯދައި މަޝްވަރާ ކޮށްފައި ވެއެވެ.
މި ބައްދަލުވުންތަކުގައި މައުލޫމާތު ދެއްވީ ނެއިބަރހުޑް ޕޮލިސިންގ ޕްރޮޖެކްޓްގައި އިސްކޮށް ހަރަކާތްތެރިވާ އިންސްޕެކްޓަރ އޮފް ޕޮލިސް ޢަބްދުﷲ ރަޝީދުގެ އިތުރުން ޗީފް އިންސްޕެކްޓަރ އޮފް ޕޮލިސް އަޙްމަދު ރަޝްވާން އެވެ. މި ބައްދަލުވުންތަކުގައި އއ. އަތޮޅު ކޮމާންޑަރު ސަބް އިންސްޕެކްޓަރ އޮފް ޕޮލިސް ހާމިދާ ޢަބްދުލް އަލީމް އާއި އއ. އަތޮޅުގެ ޕޮލިސް ސްޓޭޝަންތަކުގެ އިންޗާޖުންނާއި ކައުންސިލްތަކުގެ މެމްބަރުންނާއި ސަރުކާރު މުއައްސަސާތަކުގެ އިސްވެރިންނާއި ކުލަބް ޖަމްޢިއްޔާތަކުގެ މެމްބަރުން ބައިވެރިވެފައިވާކަމަށް ފުލުހުން މައުލޫމާތުދެއެވެ.
