ޔާމީނާއި ބެހޭގޮތުން ދޮގު މައުލޫމާތު ފަތުރާ މީޑިއާތަކާއި ދެކޮޅަށް ފިޔަވަޅު އަޅާނަން: ވަކީލުން
ކުރީގެ ރައީސް އަބްދުﷲ ޔާމީން އަބްދުލްޤައްޔޫމް އާއި ބެހޭގޮތުން ދޮގު މައުލޫމާތު ފަތުރާ މީޑިއާތަކާއި ދެކޮޅަށް ފިޔަވަޅުއަޅާނެ ކަމަށް އެމަނިކުފާނުގެ ވަކީލުން ވިދާޅުވެއްޖެއެވެ.
ރައީސް ޔާމީންގެ ވަކީލުން ވިދާޅުވީ، މިމަހުގެ އަށްވަނަ ދުވަހު ހައިކޯޓުގައި އޮތް، ރައީސް ޔާމީންގެ އަޑުއެހުމަކާއި ގުޅޭގޮތުން، ދައުލަތުގެ މީޑިއާ ޕީއެސްއެމް އިން ގެނެސްދިން ޚަބަރެއްގައި ދޮގު މައުލޫމާތު ހިމަނާފައިވާ ކަމަށެވެ.
އެހެންކަމުން ޕީއެސްއެމްއާއި، ރައީސް ޔާމީން އާއި ބެހޭގޮތުން ދޮގު މައުލޫމާތު ފަތުރާ އެހެން މީޑިއާތަކަށް އެޅެން ހުރި އެންމެ ހަރުކަށި ފިޔަވަޅު އަޅާނެ ކަމަށް އެމަނިކުފާނުގެ ވަކީލުން މިއަދު ވިދާޅުވިއެވެ.
މަނީ ލޯންޑަރިންގެ މައްސަލައިގައި ރައީސް ޔާމީންގެ މައްޗަށް މިދިޔަ އަހަރުގެ ނޮވެމްބަރު މަހުގެ 28 ވަނަ ދުވަހު ކްރިމިނަލް ކްރިމިނަލް ކޯޓުން ކޮށްފައިވާ ފަސް އަހަރު ދުވަހުގެ ޖަލު ހުކުމުގެ އިސްތިއުނާފު މައްސަލަ ހައިކޯޓުގައި ކުރިއަށްދާއިރު، އެ މައްސަލައިގެ އަޑުއެހުމެއް އެންމެ ފަހުން ބޭއްވީ މި މަހުގެ އަށް ވަނަ ދުވަހުއެވެ.
އެއަޑުއެހުމުގައި ރައީސް ޔާމީން ދެއްކެވި ވާހަކަތައް ކިޔައިދެމުން ޕީއެސްއެމްގައި ލިޔެފައި ވަނީ، ގއ. ވޮޑަމުލާ އަކީ އެމަނިކުފާނާ ގުޅުން އޮންނަ ރަށެއް ނޫން ކަމަށާއި، އެ ރަށް ދީފައި ވަނީ ކުރީގެ ނައިބު ރައީސް އަހުމަދު އަދީބުގެ ދެ ރައްޓެހިންނަށް ކަމަށް އެމަނިކުފާނު ވިދާޅުވި ކަމަށެވެ. އަދި އެ ރަށް ދޭން ވެގެން އަދީބު ރައީސް ޔާމީންގެ އަރިހުގައި އެދިވަޑައިގެންނެވި ކަމަށްވެސް ރައީސް ޔާމީން ވިދާޅުވި ކަމަށް ޕީއެސްއެމްގެ ޚަބަރުގައި ލިޔެފައިވެއެވެ.
ޕީއެސްއެމްގެ އެޚަބަރާއި ގުޅިގެން ރައީސް ޔާމީނުގެ ވަކީލުން މިއަދު ނެރުއްވި ބަޔާނުގައި ވިދާޅުވެފައި ވަނީ އެމަނިކުފާނު ޝަރީއަތުގެ އެއްވެސް މަރުހަލާއެއްގައި އިތުރުފުޅު ހައްދަވާފައި ނުވާ ކަމަށާއި ވޮޑަމުލާ ކިޔާ ރަށެއް އޮންނަކަން އެމަނިކުފާނަށް އެނގިވަޑައިގެންނެވީ ކްރިމިނަލް ކޯޓުގެ ޝަރީއަތުގެ މަޖިލީހުގައި ކަމަށް އެމަނިކުފާނު ވިދާޅުވި ކަމަށެވެ. ނަމަވެސް އެއީ އިތުރުފުޅެއް ނޫން ކަމަށް ވެސް އެބަޔާނުގައި ވިދާޅުވެފައިވެއެވެ.
