ރޭޕް ކުރާ މީހުން ސަލާމަތެއް ނުވާނެ: ޕީޖީ ޝަމީމް
ރޭޕް ފަދަ ކުށް ތަކަށް އަރައިގަތުމަށްފަހު ސަލާމާތް ނުވާނެ ކަން އެނގެންވާނެ ކަމަށް ޕީޖީ ހުސެއިން ޝަމީމް ބުނެފިއެވެ.
11 އަހަރު ކުއްޖާ ރޭޕް ކުރި ހއ. ބާރަށް، ސިލްސިލާގެ، އަނީސް ޙިލްމީގެ މައްޗަށް ދައުލަތުން އުފުލި ތިން ދައުވާއާ ގުޅޭ ތަފްސީލުތައް ހާމަ ކުރަމުން ޕީޖީ އޮފީހުން ކުރި ޓްވީޓް ރީޓްވީޓް ކުރައްވަމުން ޕީޖީ ޝަމީމް ވިދާޅުވީ މާ ގިނަ ވާހަކަ ނުދައްކާ އަދި ދައްކަމުން ވެސް މިކަން، އަމާނާތްތެރިކަމާއި، އިޚްލާޞްތެރިކަމާއެކު ކުރެވޭތޯ މަސައްކަތް ކުރަމުން އަންނަ ކަމަށެވެ.
މާލޭގެ ގެސްޓްހައުސް އެއްގައި، 11 އަހަރުގެ ކުޑަ ކުއްޖަކު ގްރޫމް ކޮށްގެން ގެންގޮސް ރޭޕްކުރި ކަމަށް ތުހުމަތު ކުރެވޭ މީހާގެ މައްޗަށް ތިން ދައުވާއެއް ވަނީ ކޮށްފައެވެ.
މައްސަލައިގައި ދައުވާ އުފުލާފައިވަނީ ހއ.ބާރަށް، ސިލްސިލާގޭ/ އަނީސް ހިލްމީ ގެ މައްޗަށެވެ.
ޕަބްލިކް ޕްރޮސެކިއުޓާ އަޙުމަދު ޝަފީއު ވިދާޅުވީ، އަނީސްގެ ފޯނު ބަލައި ޗެކްކުރިއިރު އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ވެސް ފެނިފައިވާ ކަމަށެވެ.
އަނީސް ގެ މައްޗަށް އުފުލާފައިވާ ދައުވާ ތަކަކީ:
▪︎ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދައުވާ (މިދައުވާ ގެ އަދަބަކީ 10-14 އަހަރުގެ ޖަލު ހުކުމެއް)
▪︎ ކުޑަކުއްޖަކަށް ޖިންސީ ގޯނާކުރުމަށްޓަކައި އެކުއްޖާ ގްރޫމްކުރުމުގެ ކުށުގެ ދައުވާ (މިދައުވާގެ އަދަބަކީ 10 އަހަރުގެ ޖަލު ހުކުމެއް)، އަދި
▪︎ އޮރިޔާންކާޑު ގެންގުޅުމުގެ ކުށުގެ ދައުވާ (މިދައުވާގެ އަސާސީ އަދަބަކީ އެއް މަހާއި 6 ދުވަހުގެ ޖަލު ހުކުމެއް) މިއެވެ.
