ނައްސި ކަމަށްބުނެ، ބޭރަށް ދިޔުމުގެ ހުއްދަވެސް މަރުކަޒުން ދިން! ރަށުގައި ބައްދަލުނުވާ މީހަކު ނުހުންނާނެ!: ދުވާފަރުން ފައްސިވީ އާއިލާ
ރ. ދުވާފަރުން އިއްޔެ ތިން މީހަކު ކޮވިޑް-19 އަށް ފައްސި ވެފައިވާއިރު، އެމީހުން އެބައްޔަށް ނައްސި ކަމަށް އެރަށު ސިއްޙީ މަރުކަޒުން ކުރިން އެންގުނީ "އޮޅިގެން" ކަމަށް ބުނި ކަމަށް، އެއާއިލާއިން ބުނެފުއެވެ.
އޮންލައިން ނޫސް "ސީއެންއެމް" އިން ބުނެފައިވަނީ މާލެއިން ރަށަށް ކަރަންޓީނުވުމަށް ދުވާފަރުގެ އެދެމަފިރިން ދިޔައީ އެމީހުން އަންހެން އަދި ފިރިހެން ދަރިފުޅާއެކު ކަމަށް، އެއާއިލާއިން ބުނެފައިވާ ކަމަށެވެ.
އެދެމަފިރިންނާއި އެމީހުންގެ އަންހެން ދަރިފުޅު ކޮވިޑް އަށް ނައްސި ކަމަށް މީގެ ހަ ވަރަކަށް ދުވަސް ކުރިން އެންގި ނަމަވެސް ފިރިހެން ދަރިފުޅުގެ ނަތީޖާ އެއިރު ނުލިބޭ ކަމަށް ވެސް ބުންޏެވެ. ފިރިހެން ކުއްޖާގެ ނަތީޖާ ނުލިބިގެން އާއިލާއިން ގުޅާ އެކަމުގެ ކަންބޮޑުވުން ފާޅުކުރުމުން ފިރިހެން ކުއްޖާ ވެސް ބައްޔަށް ނައްސި ކަމަށް މީގެ ހަތަރު ވަރަކަށް ދުވަސް ކުރިން އެރަށުގެ ސިއްޙީ މަރުކަޒުން އެންގި ކަމަށްވެސް ބުނެފައިވެއެވެ.
ދުވާފަރުގެ އެދެމަފިރިންނާއި އެމީހުންގެ އެފިރިހެން ދަރިފުޅު ބައްޔަށް ފައްސި ވެފައިވާކަން އިއްޔެ ވަނީ އެނގިފައެވެ. ނަމަވެސް އެކަން އިއްޔެ އެނގުނުއިރު، މީގެ ކުރިން އެމީހުން ނައްސި ކަމަށް ބުނެފައިވުމުން އެއާއިލާގެ އެހެން މީހުންނާއި ރަށުގެ އެހެން މީހުން ވެސް ވަނީ ނުރައްކަލެއްގެ ތެރެއަށް ވެއްޓިފައެވެ.
އެގޮތުން އެއާއިލާއިން ވާހަކަ ދެއްކި މީހަކު ބުނެފައިވާ ގޮތުގައި އެމީހުން ބޭރަށް ނިކުމުގެ ހުއްދަ ސިއްޙީ މަރުކަޒުން ދިނުމުންް، ގޭގައި ދަމާފައިހުރި ޓޭޕް ވެސް ނައްޓާލިއެވެ. އެހެންކަމުން ކަރަންޓީނުވީ މީހުން ވެސް ބޭރަށް ނިކުތް ކަމަށާއި އެދެމަފިރިންގެ ފިރިހެން ދަރިފުޅު ރަށުގައި ބައްދަލު ނުވާނެ މީހަކު ވެސް ނުހުންނާނެ ކަމަށް އެމީހުން ބުނެފައިވެއެވެ. އަދި ކުޑަ ފިރިހެން ކުއްޖާ އިއްޔެ ހުކުރު ނަމާދަށާއި މިއަދު ފަތިސް ނަމާދަށް ދިޔަ ވާހަކަވެސް ބުނެފައިވެއެވެ.
މީގެއިތުރުން އެގެއަކީ ވިޔަފާރިކުރުމުގެ ގޮތުން ފިހާރައެއް ވެސް ހިންގާ ގެއަކަށްވުމުން، އެފިހާރައިން ވެސް ވަރަށް ގިނަ މީހުންނާއި އެމީހުން ބައްދަލުވެފައިވާ ކަމަށް އާއިލާގެ ފަރާތުން ވާހަކަ ދެއްކި މީހާ ވަނީ ބުނެފައެވެ.
ރަށު ސިއްޙީ މަރުކަޒުން "އޮޅިގެން" އެފަދަ ނަތީޖާއެއް އެންގުމުން، އެގޭގައި ތިބި ހައި ރިސްކުގެ މީހުން ވެސް ވަނީ ނުރައްކަލުގެ ތެރެއަށް ވެއްޓިފައެވެ. އަދި މިއީ ސިއްޙީ މަރުކަޒުގެ އިހުމާލުންވީ ކަމެއްކަމަށް އެއާއިލާއިން ވަނީ ތުހުމަތުވެސް ކޮށްފައެވެ.
މިކަމާއި ގުޅޭގޮތުން ސިއްހީ މަރުކަޒުގެ ސީނިއާ އެޑްމިނިސްޓްރޭޓާ އާމިރު އަހުމަދު އެނޫހަށް މައުލޫމާތު ދެއްވަމުން ވިދާޅުވެފައިވަނީ އެއާއިލާއަށް ހުރިހާ އެންގުމެއް ވެސް އެންގީ ކަމާއިބެހޭ ފަރާތްތަކުން އެންގި ގޮތަށް ކަމަށެވެ.
"އެޗްޕީއޭއިން އަޅުގަނޑުމެންނަށް އަންގަމުންދާ ގޮތަށް އަޅުގަނޑުމެން މި އަމަލުކުރަމުންދަނީ. ކަރަންޓީންވެ އިތުރު ހަތަރު ފަސްވަަރަކަށް ދުވަސްވަންދެން އެބޭފުޅުން ގެއިން ނުނިކުންނަން އަންގާފަ، އަދި އެބޭފުޅުން ތިބީ ގޭގަ. އަދި ނަތީޖާ އެޗްޕީއޭއިން އަޅުގަނޑުމެންނަށް އެންގީމަ، އަޅުގަނޑުމެން އެބޭފުޅުންނަށް އެންގީ ނަތީޖާ ނެގެޓިވް ކަމަށް،" އާމިރު ވިދާޅުވެފައިވެއެވެ.
