އެޗްއާރުސީއެމްގެ ރައީސް އިސްތިއުފާ ދެއްވައިފި
އެޗްއާރުސީއެމްގެ ރައީސާ އައިމިނަތު އީނާސް އިސްތިއުފާ ދެެއްވައިފި އެވެ.
އެ ކޮމިޝަންގެ ރައީސްގެ އިތުރުން، އިތުރު މެމްބަރަކު ވެސް ވަނީ އިސްތިއުފާ ދެއްވާފައެވެ. މި ދެ މެމްބަރުން އިސްތިއުފާ ދެއްވާފައި މިވަނީ އެ ކޮމިޝަނުންގެ މެމްބަރުން ވަކިކުރަން ހިއުމަން ރައިޓްސް އެންޑް ޖެންޑާ ކޮމިޓީން ނިންމައި އެ މަސައްކަތް ކުރިއަށް ގެންދަނިކޮށެވެ. އެއާއެކު، ކޮމިޝަންގެ ހަތަރު މެމްބަރެއްގެ ދައުރު ހަމަވާތީ، އެ ކޮމިޝަނަށް ކުރިމަތިލާން ވެސް ރައީސް އޮފީހުން ވަނީ ހުޅުވާލައިފަ އެވެ.
އެ މައްސަލައާއި ގުޅިގެން މިއަދުގެ ނިޔަލަށް މަޖިލީހަށް ޖަވާބުދާރީވުމަށް އެޗްއާރްސީއެމްގެ މެންބަރުންނަށް ޖެންޑަ ކޮމެޓީން ވަނީ އަންގާފައެވެ. އީނާސް މަގާމުން އިސްތިއުފާ ދެއްވީ ލިޔުމުން ކޮމެޓިއަށް ޖަވާބުދާރީވުމަށްފަހު އެވެ.
މިދިޔަ މަހުގެ 18 ވަނަ ދުވަހު ބޭއްވި ޖަލްސާގައި މަޖިލީހުގެ ރައީސް މުހައްމަދު ނަޝީދު ވިދާޅުވީ އެޗްއާރުސީއެމް މެންބަރުން ވަކިކުރުމަށް ކުރަން ޖެހޭ ކަންކަން ކުރިއަށް ގެންދިއުމަށް އެދި ހިއުމަން ރައިޓްސް ކޮމިޓީގެ މުގައްރިރު ޖީހާން މަހުމޫދު އެމަނިކުފާނަށް ސިޓީއެއް ފޮނުވާފައިވާ ކަމަށެވެ. އެ މައްސަލަ ކޮމިޓީއަށް ފޮނުވާފައިވާ ކަމަށް ރައީސް ނަޝީދު ވިދާޅުވި އެވެ.
ކުރީގެ ސަރުކާރުގައި ކޮމިޝަނަށް އައްޔަންކުރި މެމްބަރުން ގާނޫނީ ޒިންމާއަދާކުރާ މިންވަރު ބަލާ މައްސަލައެއް ދިރާސާކޮށް، މަގާމުން ވަކިކުރަން ނިންމައި މަޖިލީހުގެ ކޮމިޓީން މިދިޔަ މެއި މަހު ފޮނުވި މައްސަލައިގައި އެ މެމްބަރުން މަގާމުގައި ބައިތިއްބައިގެން ނުވާނެ ގިނަ ސަބަބުތަކެއް ފާހަގަކޮށްފައިވެ އެވެ.
