ހަމަނުޖެހުން ހިންގައި ފުލުހުންނަށް ހަމަލާދިން އިތުރު 18 ބިދޭސީއަކު ހައްޔަރުކޮށްފި
އައިލެންޑް އެކްސްޕާޓް ޕްރައިވެޓް ލިމިޓެޑްގެ ބިދޭސީން ހުޅުމާލޭގައި ހަމަނުޖެހުން ހިންގި މައްސަލާގައި އިތުރު 18 ބިދޭސީ މީހަކު ހައްޔަރު ކޮށްފައިވާ ކަމަށް ފުލުހުން ބުނެފި އެވެ.
މީގެ ކުރިން ވަނީ 22 މީހަކު ވެސް ހަމަ އެ މައްސަލާގައި ހައްޔަރުކުރި އެވެ.
މުސާރަ ނުދިނުމާ ގުޅިގެން ހުޅުމާލޭގައި މިއަދު މުޒާހަރާކޮށްފައިވަނީ ސިފައިންނާއި ފުލުހުންނަށް ހުޅުމާލޭގައި އިމާރާތް ކުރާ ފްލެޓްތަކުގެ މަސައްކަތް ކުރާ ތައިލެންޑުގެ އައިލެންޑް އެކްސްޕާޓް ކުންފުނީގެ ބިދޭސީ މުވައްޒަފުންތަކެކެވެ.
މި މުޒާހަރާގެ ތެރެއިން ހަމަނުޖެހުން ހިންގައި، ބައެއް ފުލުހުންނަށް އަނިޔާވެ ވެހިކަލްތަކަށް ވަނީ ގެއްލުންދީފައެވެ. އެ ހަމަނުޖެހުން މިހާރު ވަނީ ކޮންޓްރޯލްކޮށްފައެވެ.
މި ހަމަނުޖެހުން ހިންގި ބިދޭސީން ހައްޔަރުކުރުމުގެ މަސައްކަތް ފުލުހުން ފަށާފައިވާއިރު، މިހާތަނަށް 40 މީހަކު ހައްޔަރުކޮށްފައިވާ ކަމަށް ފުލުހުންގެ އޮފިޝަލަކު ވަނީ ވިދާޅުވެފައެވެ.
