ސަމާލުވޭ! ކުޑަ ކުއްޖެއްގެ ފޮޓޯ ބޭނުންކޮށްގެން އޮޅުވާލައިގެން ފައިސާ ހޯދަނީ
އޮޅުވާލާއިގެން މަކަރާއި ހީލަތުން ފައިސާ ހޯދުމަކީ ދިވެހިންގެ ތެރޭގައި މިހާރަކަށް އައިސް ހިނގަމުން އަންނަ ކަމެކެވެ. މިފަދަ މީހުންގެ ދަލުގައި އެތައް ބަޔަކު ޖެހިފައި ވެސް އެބަ ތިއްބެވެ.
އަނެއްކާވެސް މިވަނީ މިފަދަ ގޮތަކަށް އޮޅުވާލައިގެން ފައިސާ ހޯދަމުން އައި މީހަކު އާންމުންގެ ސަމާލުކަމަށް އައިސްފައެވެ.
މިފަދަ އެހެން މީހުނެކޭ އެއްފަދައިން މި މީހާގެ ވެސް ވާހަކަ ވަރަށް މޮޅުވެފައި ފުރިހަމައެވެ. ބޭރުގެ ގައުމެއްގެ ބަލި ކުއްޖެއްގެ ފޮޓޯ ޖަހައި، ލާރި ނެތިގެން އެނބުރި ރާއްޖެ ނުދެވިފައި ހުރި ކަމަށާއި ބޭނުން ވަނީ ފައިސާގެ އެހީކަމަށް އޭނާ ބުނެފައިވެއެވެ. އަދި އޭނާ ބޭނުންވަނީ ހަމައެކަނީ 3200 ރުފިޔާކަން ވެސް އޭނާ ފާޙަގަކޮށްފައިވެއެވެ.
އަދި އެކައުންޓު ނަންބަރު ހިއްސާކޮށް "ﷲ އަށްޓަކާ ނަމަވެސް " އެހީއެއް ވެދިނުމަށް އެދިފައިވެއެވެ.
މީގެ އިތުރުން ވެސް އޭނާ އަކީ އެކަނިވެރި މައެއް ކަމަށާއި އެހީއެއް ވެދިނުމަށް އާދޭސްކޮށްފައިވެއެވެ.
ގިނަ ބަޔަކު އަންނަނީ "އަމިނަތު ޝިފޫ" ނަމުގައި އެހީއެއް އެދެމުން އަންނަ އަންހެން މީހާ ބޭނުން ކުރަނީ އޭނާ އާ ގުޅުމެއް ނެތް ކުއްޖެއް ކަން ފާހަގަކޮށްފައެވެ. އަދި އެތައް ބަޔަކު މިހާރުވެސް އޭނާ އަށް އެހީވެފައި އޮވެދާނެ ކަމަށް ބައެއް މީހުން ބުނެއެވެ. އަދި މިފަދަ މީހުނާއި ހެދި ހަގީގަތުގައި ވެސް އެހީ ބޭނުންވާ މީހުނަށް އެހީ ލިބުމަށް ދަތިވާ ކަމަށާއި އެހީގެ ޕޯސްޓުތަކަށް ކުރާ އިތުބާރުވެސް ގެއްލޭ ކަމަށް ބައެއް މީހުން ދެކެއެވެ.
މީސް މީޑިއާގައި ގިނަ ބަޔަކު އެހީގެ ޕޯސްޓުތައް ޖަހަމުން އަންނަ އިރު އޭގެ ސައްހަކަން ޔަގީންކުރުން މުހިންމެވެ.
