ބަޓަރ ޗިކަން އެއް ކާން 30 ކިލޯމީޓަރު ދަތުރުކުރި މީހަކަށް ލިބުނީ ބޮޑު ލަނޑެއް
އޮސްޓްރޭލިއާ އަށް ކޮވިޑް19 ގެ ދެވަނަ ރާޅެއް އަރާ ގިނަ ހިސާބުތަކެއް ވަނީ އަލުން ލޮކްޑައުން ކޮށްފައެވެ. ލޮކްޑައުން އާ ހިލާފުވާ މީހުން ބޮޑު އަދަދުން ޖޫރިމަނާ ދައްކަން ޖެހެއެވެ. އެގޮތުން ހޮނިހިރު ދުވަހު އެކަނި ވެސް 74 މީހަކު ޖޫރިމަނާ ކޮށްފައިވާއިރު މީގެ ތެރެއިން އެކަކުގެ ވާހަކައަށް ގިނަ ބައެއްގެ ސަމާލުކަން ވަނީ ހުއްޓިފައެވެ.
މި މީހާ އަކީ މެލްބަން ގެ ވެރިބީ އިން ބަޓާރ ޗިކަން އެއް ކެއުމަށް 30 ކިލޯމީޓަރު ދަތުރުކޮށްފައެވެ. މި މީހާ އެހާ ދުރުމިނަކަށް ދަތުރުކުރީ "މާ މީރު" ބަޓަރ ޗިކަން އެއް ކެއުމަށްކަމަށް ރިޕޯޓުތައް ބުނެއެވެ.
ކޮންމެއަކަސް އާދައިގެ ބަޓަރ ޗިކަން އެއް ކާލަން ގެއިން ނިކުތް މީހާއަށް މިވަނީ އަގުބޮޑު ބަޓަރ ޗިކަން އެއް ކެވިފައެވެ. ލޮކްޑައުންގެ ޖޫރިމަނާއަށް އޭނާ ވަނީ 1652 ޑަލަރު ދައްކާފައެވެ.
ގިނަ ބަޔަކު އަންނަނީ އޭނާ އެކެއީ މި ދުނިޔެއިން ވެސް އެންމެ އަގުބޮޑު ބަޓަރ ޗިކަން ކަމަށް ބުނަމުންނެވެ.
