ތިލަފުށި ކައިރިއަށް ބަންޑުން ޖަހާލި ދޯނިން ދަތުރު ކުރި ދެ މީހަކަށް ހޮސްޕިޓަލްގައި ފަރުވާދެނީ
ތިލަފުށި ކައިރިއަށް ބަންޑުން ޖަހާލި މުދާ އުފުލާ ދޯނިން ދަތުރު ކުރި ދެ މީހަކަށް ހޮސްޕިޓަލްގައި ފަރުވާދެމުން އަންނަ ކަމަށް ފުލުހުން ބުނެފިއެވެ.
ފުލުހުން ބުނީ ލަފުށި ބޭރުން ދޯންޏެއް ބަންޑުން ޖަހާލައި ހާލުގައި ޖެހުނު ތިން މީހަކަށް މެރިން ފުލުހުން އެހީތެރިކަން ފޯރުކޮށްދީފައިވާނެ ކަމަށާއި އެ މީހުންގެ ތެރެއިން ދެ މީހަކަށް އަނިޔާވެގެން ހޮސްޕިޓަލަށް ގެންގޮސް ފަރުވާދެމުންދާކަމަށެވެ.
ތިލަފުށި ކައިރިން ބަންޑުން ޖަހާލާފައިވަނީ މާލެއިން ފުރައިގެން ތިލަފުއްޓަށް ދަތުރުކުރި "ސެކިއޯ ބޭގް" ނަމަކަށް ކިޔާ މުދާ އުފުލާ ދޯންޏެކެވެ. އޭގައި ތިބި ތިން ފަޅުވެރިން ނަގާފައިވަނީ "ވިލާ ހަކަތަ" ނަމަކަށް ކިޔާ ދޯންޏަކަށެވެ.
މިހާދިސާގެ މައުލޫމާތު އެމްއެންޑީއެފް ކޯސްޓްގާޑް ސްކޮޑްރޮން އަށް ލިބިފައިވަނީ މިއަދު ހަވީރު 17:10 ގައެވެ.
ދަތުރު ފަތުރު ކުރައްވާއިރު ހުރިހާ ބޭފުޅުންވެސް ސަމާލުވެލެއްވުމަށް ފުލުހުން ވަނީ އެދިފައެވެ.
