މުދާތައް ނެރެ ތަން ހުސްކުރަން އެންގުމަކީ ސަރުކާރުން ނިކަމެތިންނަށް ދިން އަނިޔާއެއް: ނީލަން ފިހާރަތަކުގެ ވެރިން
ނީލަން ފިހާރައިގެ ގޮޅިތައް އަންނަ މަހުގެ 15 ވަނަ ދުވަހުގެ ކުރިން ހުސްކުރަން އަންގުމާ ގުޅިގެން އެ ފިހާރަތަކުގެ ވެރިން ކަންބޮޑުވުން ފާޅުކޮށްފިއެވެ.
ގޮޅިތައް ހުސް ކުރުމަށް އަންގައި ސިޓީ ކައުންސުން އެ ގޮޅިތަކުގެ ވެރިންނަށް މި މަހުގެ 15 ވަނަ ދުވަހު ފޮނުވި ސިޓީގައި ބުނެފައިވަނީ ޖުލައި މަހުގެ އަށް ވަނަ ދުވަހު ބޭއްވި ސިޓީ ކައުންސިލްގެ ބައްދަލުވުމުގައި ނީލަން ފިހާރައިގެ ގޮޅިތައް ހުސްކުރަން ނިންމާފައިވާ ކަމަށެވެ.
އެހެންކަމުން އަންނަ މަހުގެ 15 ވަނަ ދުވަހުގެ ކުރިން ގޮޅިތައް ހުސް ކުރުމަށާއި އެ މުއްދަތަށް ހުސްނުކޮށްފި ނަމަ ގޮޅިތަކުގައި ހުންނަ ތަކެއްޗަކީ ކުނީގެ ގޮތުގައި ބަލާ، އެތަކެތި ނައްތާލާނެ ކަމަށްވެސް ސިޓީގައިވެއެވެ.
މިކަމާ ގުޅިގެން އެ ފިހާރަތަކުގެ ވެރިން ކަންބޮޑުވުން ފާޅުކުރަމުން އަންނަ އިރު، ގިނަ އަހަރުތަކެއް ވަންދެން ނީލަން ފިހާރައިގައި ގޮޅިއެއް ހިންގަމުން އަންނަ ސައްތާރު، "ސަންގު" ޓީވީއާ ވާހަކަ ދައްކަމުން ބުނީ ފެށުނީއްސުރެ ކާންބޯން، ދިރިއުޅެން އޭނާ ކުރާ މަސައްކަތަކީ ނީލަން ފިހާރަ ހިންގުން ކަމަށެވެ. އަދި އާއިލާގެ ކަންކަމަށް ޚަރަދުކޮށް ދެކޮޅު ޖައްސަނީ އެ މަސައްކަތުން ލިބޭ އެއްޗަކުން ކަމަށް އޭނާ ބުންޏެވެ.
"މީގެ ކުރިން އައި ސަރުކާރުތަކުންވެސް އެއިރެއްގެ ހާލަތައް ބަލައިގެން މިކަން ކުރިއަދިން، މީގެން އެއްވެސް ވައްދާނެތަނެއް ނެތް، މިތަނުގައި ހުރި މުދަލުގެ އަގު ތިން ލައްކަ ރުފިޔާއަށްވުރެ ގިނަ ވާނެ، މީވެސް ހިލޭ ލިބޭ އެއްޗެއް ނޫން، މި ކަމުން އަޅުގަނޑުމެނަށް ވާން ގެއްލުމުގެ ޒިންމާ ނަގާނީ ކާކުތޯ" ސައްތާރު ބުންޏެވެ.
ނީލަން ފިހާރައިގެ އިތުރު ގޮޅިއެއް ހިންގާ މީހަކު "ސަންގު" ޓިވީއަށް ބުނީ މުދާތައް ގެންދާނެ އިތުރުތަނެއް ނުދައްކާ ކުއްލި އަކަށް އެއް މަސް ދުވަސް ތެރޭގައި ތަން ހުސްކުރަން އެންގުމުން ކަންބޮޑުވާ ކަމަށެވެ. އަދި އުއްމީދާއެކު އިންތިޚާބުކުރި ސަރުކާރަކުން މިގޮތަށް ކަންތައްތައް ކުރުމުން ވަރަށް ބޮޑަށް މާޔޫސްވެއްޖެ ކަމަށް އޭނާ ބުންޏެވެ.
