މިސްކިތްތައް ބަންދުކުރެވޭ ނަމަ، މަޖިލިސް ވެސް ބަންދުކުރެވެން ޖެހޭނެ: ޑރ. ނިޔާފް
މިސްކިތްތައް ބަންދުކުރެވޭ ހާލަތަށް ގެނެވޭނަމަ، މަޖިލިސް ވެސް ބަންދުކޮށް މެމްބަރުން ގޭގައި ތިއްބަވައިގެން ކުރިއަށް ގެންދެވެން ޖެހޭނެ ކަމަށް ޑރ. އަލީ ނިޔާފް ވިދާޅުވެއްޖެއެވެ.
ޑރ. ނިޔާފް މިހެން ވިދާޅުވީ ފުވައްމުލަކު އުތުރު ދާއިރާގެ އެމްޑީޕީގެ މެމްބަރު މުހައްމަދު ރަޝީދު ހުށަހެޅުއްވި ސިއްހީ ނުރައްކަލެއް އިއުލާނުކޮށް ނެރޭ ގަރާރު 48 ގަޑިއިރުތެރޭ ރައްޔިތުންގެ މަޖިލީހަށް ހުށަހަޅައި، މަޖިލީހުގެ ރުހުން ހޯދަން ޖެހޭ ގޮތަށް ހަދަން އާންމު ސިއްހަތު ރައްކާތެރި ކުރުމުގެ ގާނޫނަށް ހުށަހެޅި އިސްލާހުގެ ބިލަށް މަޝްވަރާ ހޯދުމަށް މިހާރު ކުރިއަށްދާ ބައްދަލުވުމުގައި ވާހަކަދައްކަވަމުންނެވެ.
އާންމުންގެ ހިޔާލު ހޯދުމަށް މަޖިލީހުގެ އިދާރާގައި މިރޭ ކުރިއަށް ދިޔަ އާންމު ބައްދަލުވުމުގައި ސިއްހީ ޖަމިއްޔާތަކުގެ ފަރާތުން ވާހަކަ ދެއްކެވި ސިއްހީ ބައެއް ބޭފުޅުންނާއި ޑޮކްޓަރުން ވަނީ އެ ބިލްގައި ރައްޔިތުންގެ މަޖިލީހަށް ސިއްހީ މައްސަލަތަކުގައި ކަން ނިންމުމުގެ ބޮޑެތި ބާރުތަކެއް ދިނުމަށް އޮތުމުން ވަރަށް ބޮޑަށް ކަންބޮޑުވުން ފާޅުކުރައްވައިފައެވެ.
އެގޮތުން ޑރ. ނިޔާފް ވަނީ މަޖިލީހުގެ އިދާރާއަށް މެމްބަރުން އެއްވެ ޖަލްސާތައް ކުރިއަށް ގެންދެވޭ ގޮތަށް މަޖިލީހަށް ކަނޑައެޅޭނެ ކަމަށް ބިލުގައި އޮތުމުން ވެސް ކަންބޮޑުވުން ފާޅުކުރައްވާފައެވެ.
ޑރ. ނިޔާފް ވިދާޅުވީ ބައްޔެއް ފެތުރެމުން ދާއިރު މިސްކިތްތައް ބަންދުކޮށް، ދީނުގެ އެންމެ މުހިންމު އެއް ކަންތައް ހުއްޓުވޭއިރު، ޒަމާނީ ވަސީލަތް ބޭނުން ނުކޮށް އެއް ތަނެއްގައި، ސެކިއުރިޓީ ނުލިބޭ ހާލަތެއްގައި ބަލި ފެތުރޭނެ ހާލަތަކާ ގުޅޭގޮތުން ސިއްހީ ދާއިރާއިން ކަނޑައަޅާފައި އޮތް މިންގަނޑަކަށް ނުފެތޭ ހާލަތެއްގައި އެއްވެސް ބަޔަކަށް ބައްދަލުވުމެއް ނުބޭއްވޭނެ ކަމަށް ގަބޫލުކުރައްވާ ކަމަށެވެ.
"އަޅުގަނޑުމެން މި އެދެނީ އެއް ގޮތަކަށް ވެސް މަޖިލީހުގެ ދައުރު ކުޑަކުރާކަށް. މަޖިލީހުގެ ދައުރު އޮންނަން ޖެހޭނެ. އެކަމަކު ކުޑަ ބަދަލެއް މި ބިލަށް ގެނެސްދޭން. އެއީ ސިއްހީ ކުއްލި ހާލަތުގެ ގަރާރާ މެދު މަޖިލީހުން މި ކަންކަން ނިންމަން ވާނީ ސިއްހީ މާހިރުންގެ ލަފައާއެކު ލަފާ ހޯދައިގެން ކަމަށް އިތުރުކޮށްލަދޭން،" ޑރ. ނިޔާފް ވިދާޅުވި އެވެ.
ނިޔާފް ވިދާޅުވީ މުޅި ދުނިޔޭގައި އެ ބަލިމަޑުކަން ފެތުރެމުން ދާއިރު ޑޮކްޓަރުންނާއި އެކަމާ ހަވާލުވެ ތިިބި މީހުންނަށް ބާރު ނުފޯރާ ވަރުގެ ޕޮއިންޓުތަކެއް ބިލުގައި ހުރި ކަމަށް ގަބޫލުކުރައްވާ ކަމަށެވެ.
