ބިދޭސީންނަށް ރަށްވެހިކަންދޭ ސަރުކާރު ބޭނުމެއް ނުވޭ: ފައްޔާޒު
އެއްލައްކަ ރުފިޔާއަށް ވުރެ ގިނައިން އިންވެސްޓް ކުރާ ފަރާތްތަކަށް އަދި 10 އަހަރު ގެއެއް ކުއްޔަށް ހިފައިގެން އުޅޭ ފަރާތްތަކަށް ރެސިޑެންސް ވިސާ ދިނުމުގެ ވިސްނުމެއް ސަރުކާރުގެ ނެތް ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެ އެވެ.
އިމިގްރޭޝަން ގާނޫނަށް މަޖިލީހުގެ ރައީސް ހުށަހެޅުއްވި އިސްލާހަށް ހިޔާލު ހޯދުމަށް މިނިސްޓަރު ފައްޔާޒު ވަނީ މިއަދު މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީއަށް ހާޒިރުކޮށްފަ އެވެ. އެ ކޮމިޓީގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ފައްޔާޒު ވިދާޅުވީ ގެ ކުއްޔަށް ހިފާ މީހުންނަށް ރެސިޑެންސް ވިސާ ދޭން ބޭނުން ނުވާ ކަމަށެވެ. އަދި އެއްލައްކަ ރުފިޔާ ހަރަދު ކުރާ މީހުންނަށް ވެސް ރެސިޑެންސް ވިސާ ދިނުން މުހިންމު ނޫން ކަމަށް ފައްޔާޒު ވިދާޅުވި އެވެ.
ސަރުކާރުން އިމިގްރޭޝަން ގާނޫނަށް ހުށަހަޅާފައިވާ ރެޒިޑެންސީ ވިސާގެ ކަންކަމަކީ ސިޓިޒަންޝިޕްއާ ގުޅުން ހުރި ކަމެއް ނޫން ކަމަށާއި ރެޒިޑެންސް ވިސާއަކީ ޓޫރިސްޓް ވިސާ ގޮތައް ތަންކޮޅެއް ދިގު މުއްދަތަކަށް ބޭރު މީހުންނަށް ހުރެވޭ ވިސާއެއް ކަމަށް ވެސް ފައްޔާޒް ވިދާޅުވި އެވެ.
"އެ ގާނޫނު އެބަ އޮތް މިހާރު ވެސް. އަޅުގަނޑު ދެކޭ ގޮތުގައއި އެ ގާނޫނަކީ މޮޑަނައިޒް ކޮށްލަން ޖެހޭ ގާނޫނެއް ކޮންމެހެން ބޭނުންވާ ކަމަށް ވާނަމަ، އެހެން ނަމަވެސް އަޅުގަނޑު ދެކޭ ގޮތުގައި މި އެއްލައްކަ ރުފިޔާ އިންވެސްޓްމެންޓް އެއީކީ މިވަގުތަކަށް ކޮންމެހެން ބޭނުން ކަމެއް ނޫން." ފައްޔާޒު ވިދާޅުވި އެވެ.
މިނިސްޓަރު ވިދާޅުވީ ދިގު މުއްދަތަށް ރިސޯޓުތަކުން ވިލާ ގަންނަ ފަރާތްތަކަށް ސެކަންޑް ހޯމް ރެސިޑެންސީ ވިސާގެ ގޮތުގައި ވިސާ ދިނުމުގެ ވިސްނުމެއް ގެންގުޅޭ ކަމަށެވެ. އެއީ ތިން ލައްކަ ޑޮލަރަށް ވުރެ ގިނައިން އިންވެސްޓް ކުރުމުން ކަމަށް ވެސް އޭނާ ވިދާޅުވި އެވެ.
