ދިވެހިން އެދެނީ އިޒްރޭލާއި ފަލަސްތީނުވެސް ގައުމެއްގެ ގޮތުގައި އޮތުން: ނަޝީދު
ފަލަސްޠީނާއި އިޒްރޭލުވެސް ގައުމެއްގެ ގޮތުގައި އޮތުމަކީ ދިވެހިން ޒަމާނުއްސުރެ ދެކެމުން އައި ގޮތެއް ކަމަށް ރައްޔިތުން މަޖިލިހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ އިޒްރޭލުން ފަލަސްތީނުގެ ބިންތަކަށް ވެރިވުމަށް ކުރާ މަސައްކަތާ ދެކޮޅަށް ވިލިގިލި ދާއިރާގެ މެމްބަރު ސައުދު ހުސައިން މަޖިލީހަށް ހުށަހެޅުއްވި ގަރާރަށް މެމްބަރުން ކުރެއްވި ބަހުސްގެ ތެރެއިންނެވެ.
ރައީސް ނަޝީދު ވިދާޅުވީ ފަލަސްޠީނު ރައްޔިތުންނަށް ވަކި ދައުލަތެއް އޮތުމަކީ އަބަދުވެސް ދިވެހިން ޤަބޫލުކުރާ ގޮތް ކަމަށާއި ފަލަސްޠީނު ރައްޔިތުންނަށް ލިބެމުން އަންނަ އަނިޔާއާއި ބޭއިންސާފާއި އެމީހުންގެ ހާލަތާމެދު ދިވެހި ރައްޔިތުންގެ ޝުޢޫރު ހުރި ގޮތް، މިޤަރާރުން ފާޅުވެގެންދާނެ ކަމުގައި ޔަގީންކުރައްވާ ކަމުގައި ނަޝީދު ވިދާޅުވިއެވެ.
"އިސްރާއީލުވެސް ޤައުމެއްގެ ގޮތުގައި އޮތުމަކީ އަދި ފަލސްޠީނުވެސް ޤައުމެއްގެ ގޮތުގައި އޮތުމަކީ ޒަމާނުއްސުރެ ދިވެހިން ދެކެމުން އައި ގޮތެއް. ދިވެހިރާއްޖެއާއި އިސްރާއީލާ އޮތް ސިޔާސީ ގުޅުން ދިވެހިރާއްޖެއިން ސަސްޕެންޑުކުރީ ކަނޑައެއް ނުލާ." ރައީސް ނަޝީދު ވިދާޅުވިއެވެ.
އަދި އޭގެ އިތުރަށް ރައީސް ނަޝީދު ވިދާޅުވެފައިވަނީ ހުރިހާ މެންބަރުންވެސް ވާހަކަދެއްކެވުމުގައި ރާއްޖެއަކީ ވަރަށް ގިނަ ކަންކަމުގައި މިސާލު ދެއްކިދާނެ ޤައުމެއްކަން ގަބޫލުކުރައްވައިގެން ވާހަކަދެއްކެވުމަށް އެދިވަޑައިގަންނަވާ ކަމުގައެވެ.
