ސުޝާންތުގެ އެންމެ ފަހު ފިލްމު "ދިލް ބޭޗާރާ" ބެލި އެންމެން ރޮނީ، ތައުރީފު އޮހެނީ!
ފާއިތުވީ މަހަކަށްވުރެ ގިނަ ދުވަސް ތެރޭ، އެމީހަކަށްޓަކައި ބޮލީވުޑާއި ދުނިޔޭގެ އެކި ކަންކޮޅުތަކުން ލޯބި ލިބިފައިވާ ބޮލީވުޑްގެ އެކްޓަރ ސުޝާންތު ސިންގް ރާޖްޕޫތުގެ އެންމެ ފަހު ފިލްމު "ދިލް ބޭޗާރާ" އޮންލައިންކޮށް ރޭގައި ޕްރިމިއާރ ކޮށްފިއެވެ.
ޑިޒްނީ ޕްލަސް ހޮޓްސްޓާ ގައި ސުޝާންތުގެ މިފިލްމު ޕްރިމިއާރ ކޮށްފައިވާއިރު، މިފިލްމަށް ގިނަ ބައެއްގެ ތަރުހީބު ވަނީ ލިބިފައެވެ. އަދި ފިލްމު ބެލި ގިނަ މީހުން ބުނެފައިވަނީ އެމީހުން ދިޔައީ ހުއްޓުމެއް ނެތި ރޮމުން ކަމަށެވެ.
މިފިލްމުގައި ސުޝާންތާއެކު އެކްޓު ކޮށްފައިވަނީ ސަންޖަނާ ސާންގީ އެވެ. މިއީ މަޝްހޫރު ވާހަކަ ލިޔުންތެރިޔާ ޖޯން ގްރީން ގެ ކާމިޔާބު އެއްވާހަކަ ކަމަށްވާ "ފޯލްޓް އިން އަވަރ ސްޓާސް" ގެ މައްޗަށް ބިނާކޮށް އުފައްދާފައިވާ ފިލްމެކެވެ.
"ދިލް ބޭޗާރާ" ގެ ކުރިން ހޮލީވުޑް އިންވެސް ވަނީ މިވާހަކައިގެ މައްޗަށް ފިލްމު އުފައްދާފައެވެ. އަދި އެފިލްމަށް ކިޔާފައިވަނީ ވެސް ވާހަކައަށް ކިޔާ ނަމެވެ.
ފިލްމުގެ މެއިން ކެރެކްޓަރަކަށް އުޅެނީ "ކިޒީ" އާއި "މެނީ" އެވެ. ކިޒީ އަށް ހުންނަނީ ތައިރޮއިޑް ކެންސަރ ޖެހިފައެވެ. އަދި މެނީ އަށް ހުންނަނީ އޮސްޓީއޯސަރްކޮމާ ޖެހިފައެވެ. ފިލްމުގައި ދައްކުވައިދެނީ އެދެމީހުން އެކަކު އަނެކަކުގެ ދިރިއުޅުން އުފާވެރިކޮށް ދިނުމަށް ކުރާ މަސައްކަތްތަކެވެ.
"ދިލް ބޭޗާރާ" އަށް ވަރަށް ގިނަ ތަރިންނާއި އާއްމުންގެ ތަރުހީބު ވަނީ ލިބިފައެވެ.
މިއީ ސުޝާންތު ސިންގް ރާޖްޕޫތުގެ އެންމެ ފަހު ފިލްމުކަމުން، ފިލްމު ބެލުމަށްފަހު ވެސް ގިނަ މީހުން ވަނީ އޭނާ މިހާރު މިދުނިޔޭގައި ނެތުމުން އެކަމުގެ ހިތާމަ އިތުރަށް ކޮށްފައެވެ.
