46،260ރުފިޔާގެ މުސާރައަކާއެކު މެޑަމް ފަޒްނާގެ ކޮއްކޮ، މިފްކޯގެ ކޮންސަލްޓަންޓަކަށް ހަމަޖެއްސިކަމުގެ ތުހުމަތު
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ކޮންސަލްޓަންޓަކަށް ފަސްޓް ލޭޑީ ފަޒްނާ އަޙްމަދުގެ ކޮއްކޯފުޅު ނަޒީ އަޙުމަދު (ނަޒީ)، 3000 ޑޮލަރު (46،260 ރުފިޔާ)ގެ މުސާރައަކާއެކު ހަމަޖައްސަވައިފައިވާ ކަމުގެ ތުހުމަތުތަކެއް ފެންމަތިވެއްޖެއެވެ.
އިދިކޮޅު ޕީޕީއެމްގެ ކައުންސިލު މެމްބަރު ޒާހިދު ރަމީޒް ކުރެއްވި ޓްވީޓެއްގައި ވިދާޅުވީ މިފްކޯގެ ކޮންސަލްޓަންޓަކަށް 3000 ޑޮލަރުގެ މުސާރައަކާއެކު ފަސްޓްލޭޑީ ފަޒްނާގެ ކޮއްކޯފުޅު ނަޒީ ހަމަޖައްސަވައިފައިވާ ކަމުގެ އަޑުތަކެއް ފެތުރިފައިވާ ކަމަށެވެ.
"މިފްކޯ އިން މަސްވެރިންނަށްވީ ވައުދު ފުއްދޭނީ މިކަހަލަ ގޮތަކަށް ދޯ؟ ރައީސް އިބްރާހިމް މުޙައްމަދު ޞާލިޙަށް ހަމަ ސާބަސް" ޒާހިދު ވިދާޅުވެފައިވެއެވެ.
މިކަމާ ބެހޭ ގޮތުން މިފްކޯގެ ބަހެއް ހޯދައިލުމަށް އެ ކުންފުނީގެ ޗީފް އެގްޒެކެޓިވް އޮފިސަރ (ސީއީއޯ) އިސްމާއިލް ފައުޒީއަށް "ދެން" ގެ ފަރާތުން ގުޅައިލުމުން، ފޯނަށް ޖަވާބު ނުދެއްވުމުގެ ސަބަބުން ވަނީ ބަހެއް ލިބޭގޮތް ނުވެފައެވެ. އަދި އެ ކުންފުނީގެ މީޑިއާ އޮފިޝަލަކާ ވެސް ވަނީ ގުޅޭގޮތް ނުވެފައެވެ.
