އެމްޑީޕީ ލަދު ގަންނަވައިލައި، މުޅި މާލޭގެ ރައްޔިތުން ހޮވާ ފުރަތަމަ މޭޔަރަކަށް މުޢިއްޒު
ސަރުކާރު ހިންގާ އެމްޑީޕީގެ ކެންޑިޑޭޓް އަނަސް އަބްދުއްސައްތާރު ބަލިކޮށް، މާލެ ސިޓީ މޭޔަރުގެ ގޮނޑި އިދިކޮޅު ކެންޑިޑޭޓް ޑރ.މުޙައްމަދު މުޢިއްޒު އިންތިހާބުވެ ވަޑައިގެންފިއެވެ.
ޑރ. މުޢިއްޒު އާއި އަނަސްގެ އިތުރުން މާލޭ މޭޔަރު ކަމަށް ދެން ވާދަ ކުރެއްވީ އަމިއްލަ ގޮތުން ކުރިމަތިލެއްވި ރައްޔިތުންގެ މަޖިލީހުގެ ކުރީގެ މެންބަރު އަލްހާން ފަހުމީއެވެ.
މިހާތަނަށް ލިބިފައިވާ ވަގުތީ ނަތީޖާތަކުން ދައްކާގޮތުން މުޢިއްޒު އިންތިހާބުވެ ވަޑައިގަންނަވާނެ ކަން ވަނީ ކަށަވަރުވެފައެވެ. މިހާރުގެ ނަތީޖާއަށް ބަލާއިރު މުއިއްޒު ވަނީ މާލޭގައި ބެހެއްޓި 23 ވޯޓް ފޮށީގެ ތެރެއިން 22 ފޮށިން ކުރި ހޯދައިފައެވެ. އެ ގޮތުން އެ މަނިކުފާނު ވަނީ 60 އަށް ވުރެ މަތީ އިންސައްތައެއް ކަށަވަރު ކުރައްވާފައެވެ.
ޕީޕީއެމްގެ ނައިބު ރައީސްކަން ވެސް ކުރައްވަމުން އަންނަ ޑރ. މުޢިއްޒު އަކީ ކުރީގެ ރައީސް ޑރ.މުޙައްމަދު ވަހީދު ޙަސަން މަނިކުގެ ވެރިކަމުގައާއި ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ހައުސިންގ މިނިސްޓަރުކަން ކުރައްވައިފައިވާ ބޭފުޅެކެވެ.
