މާލޭ ސަރަހައްދުގައި ފިތުރު ޒަކާތް ބަލައިގަންނާނީ އޮންލައިންކޮށް
މާލޭ ސަރަހައްދުގައި ޒަކާތް ބަލައިގަތުމަށް ހަމަޖެހިފައި ވަނީ އޮންލައިންކޮށް ކަމަށް އިސްލާމިކް މިނިސްޓްރީއިން އިއުލާން ކޮށްފިއެވެ.
އިސްލާމިކް މިިނިސްޓްރީން ބުނީ، މާލެ ސިޓީ (މާލެ، ހުޅުމާލެ އަދި ވިލިމާލެ) ގައި 1442 ވަނަ އަހަރުގެ ފިތުރު ޒަކާތް ބަލައިގަތުމަށް ހަމަޖެހިފައި ވަނީ 01 ރަމަޟާން 1432 (13 އެޕްރީލް 2021 ވަނަ ދުވަހުން ފެށިގެން 29 ރަމަޟާން 1442 (14 މެއި 2021) ވަނަ ދުވަހާ ހަމައަށް ކަމަށެވެ.
އިސްލާމިކް މިނިސްޓްރީން ބުނެފައި ވަނީ ދިރާގު "ޕޭ" އަދި އެ ކުންފުނީގެ ނައުއެމްވީ އެޕްލިކޭޝަނާއި އުރީދުގެ އެމްފައިސާގެ އިތުރުން ދެ ނެޓްވޯކުން މެސެޖު ކޮށްގެން ވެސް ޒަކާތް ދެއްކޭނެ ކަމަށެވެ. ހަމައެހެންމެ މޯލްޑިވްސް އިސްލާމިކް ބޭންކްގެ ފައިސާނެޓް މެދުވެރި ކޮށާއި އެ ބޭންކްގެ ބުރާންޗުތަކުގެ އިތުރުން ބޭންކް އޮފް މޯލްޑިވްސްގެ ވެބްސައިޓުންނާއި، ފަހިޕޭގެ އެޕްލިކޭޝަން އަދި ޕޯޓަލް މެދުވެރިކޮށް ވެސް ޒަކާތް ދެއްކޭނެ އިންތިޒާމު ވަނީ ހަމަޖެހިފައެވެ.
އިސްލާމިކް އެފެއާޒުން ބުނީ މާލެ ސިޓީ ފިޔަވައި ރަށްރަށުގައި ފިޠުރުޒަކާތް ބަލައިގަތުމުގެ އިންތިޒާމު ހަމަޖައްސާނީ އެރަށެއްގެ ރަށު ސިޓީ ކައުންސިލަކުން ކަމަށެވެ.
ފިޠުރު ޒަކާތުގެ ގޮތުގައި ނެރޭނީ އަހަރު ތެރޭގައި އެރަށެއްގައި ބަނޑުކެއުމުގެ ގޮތުގައި ޢާންމުކޮށް ކައިއުޅުނު ބާވަތަކުން 2.4 ކިލޯގެ އަގެވެ. ރަސްމީކޮށް ޒަކާތް ބަލައިގަތުމަށް ހަމަޖެހިފައިވަނީ 2.4 ކިލޯގެ ގޮވާމުގެ އަގަށްވާ ފައިސާއިންނެވެ.
މާލެ ސިޓީ ސަރަހައްދުތަކުންނާއި، ހުޅުމާލެ އަދި ވިލިމާލެއިން ފިތުރު ޒަކާތް ދައްކަންޖެހޭ އަދަދުގެ ތެރޭގައި، އާދައިގެ ހަނޑޫނަމަ ދައްކަން ޖެހޭނީ 12 ރުފިޔާއެވެ. އާދައިގެ ބާސްމަތީ ހަނޑޫނަމަ 125 ރުފިޔާއެވެ. އަދި ތައިލެންޑް ހުދު ހަނޑޫ ނަމަ 52 ރުފިޔާއާއި ރަތް ހަނޑޫ ނަމަ 78 ރުފިޔާއެވެ. މޮޅު ބާސްމަތީ ހަނޑުލުން ނަމަ 65 ރުފިޔާއެވެ. އެންމެ މޮޅު ބާސްމަތީ ހަނޑޫ ނަމަ 125 ރުފިޔާ އަދި އާދައިގެ ފުށުން ނަމަ 10 ރުފިޔާ، އާޓާ ފުށް ނަމަ 59 ރުފިޔާއެވެ.
