އިޖުތިމާއީ ކޮމިޓީގެ މުގައްރިރުކަމުން އީސަ އިސްތިއުފާ ދެއްވައިފި
ރައްޔިތުންގެ މަޖިލީހުގެ އިޖްތިމާއީ ކޮމިޓީގެ މުގައްރިރު ކަމުގެ މަގާމުން ކެނދިކުޅުދޫ ދާއިރާގެ މެންބަރު އަހްމަދު އީސަ އިސްތިއުފާ ދެއްވައިފިއެވެ.
"ދެން" އަށް އެކަން ކަށަވަރު ކޮށްދެއްވަމުން ރައްޔިތުންގެ މަޖިލީހުގެ ޑިރެކްޓަރ، މީޑިއާ އެންޑް ކޮމިއުނިކޭޝަން ޙަސަން ޒިޔާއު ވިދާޅުވީ މަޖިލީހުގެ އިޖުތިމާއީ މުގައްރިރުކަމުން އީސަ އިސްތިއުފާ ދެއްވާފައިވާ ކަމަށެވެ.
އެނގިފައިވާ ގޮތުގައި ކޮމިޓީގެ މުގައްރިރުކަމުން އިސްތިއުފާ ދެއްވަމުން އީސަ ވަނީ މަޖިލީހަށް ސިޓީއެއް ވެސް ފޮނުއްވައިފައެވެ. އެ ސިޓީގައި އީސަ ވިދާޅުވެފައި ވަނީ ، އޭނާ އެ މަގާމުން އިސްތިއުފާ ދެއްވީ އޭނަގެ މައްޗަށް ތުހުމަތު ކުރެވޭ ގެވެށި އަނިޔާގެ މައްސަލައާ ގުޅިގެން ތަހުގީގީ އިދާރާތަކުގެ ތަހުގީގަށް އެއްބާރުލުން ދެއްވުމުގެ ގޮތުން ކަމަށެވެ.
މީގެ އިތުރުން އެ ސިޓީގައި އީސަ ވިދާޅުވީ، ރާއްޖޭގެ ގާނޫނު އަސާސީއާއި ގާނޫނުތަކާ ޚިލާފަށް އެއްވެސް ކަމެއް ނުކުރައްވާ ކަމުގެ ޔަގީން ކަން ކެނދިކުޅުދޫގެ ރައްޔިތުންނަށް އަރުވާ ކަމަށެވެ.
މެމްބަރު އީސަގެ މައްޗަށް ތުހުމަތު ކުރަނީ އޭނާގެ ކުރީގެ އަނބިކަނބަލުން އަސްރާ ނަސީމަށް ގެވެށި އަނިޔާ ކުރި ކަމަށެވެ.
އީސައާ ދެކޮޅަށް އަސްރާ ވަނީ ފުލުހުންނަށް ބަޔާން ވެސް ދެއްވައިފައެވެ.
Ads by STO
