ޑިސްއެބިލިޓީ އެމްބަސަޑަރުކަމުން ހިޝާން ވަކިކޮށްފި
ޖިންސީ ގޯނާގެ މައްސަލައަކާ ގުޅިގެން އަހުމަދު ހިޝާން އޮނަރަރީ ޑިސެބިލިޓީ އެމްބެސެޑަރުކަމުން މިއަދު ވަކިކޮށްފިއެވެ.
ޖެންޑާ މިނިސްޓްރީން މިއަދު ނެރުނު ބަޔާނެއްގައި ބުނީ، އެމްބެސެޑަރުކަމުން ހިޝާން ދުރުކުރަން ޖެހުނީ، އޭނާއާ ގުޅޭ މައްސަލައެއް ބަލަމުންދާކަން ފުލުހުން އެ މިނިސްޓްރީއަށް އަންގާފައިވާތީ ކަމަށެވެ.
އިޖުތިމާއީ ގޮތުން ހިދުމަތްކުރެއްވުމަށްޓަކައި އޮނަރަރީ މަގާމުތަކުގައި ހުންނަވާ ފަރާތްތަކަކީ ނަޒާހަތްތެރި އަދި އާންމު ރައްޔިތުންގެ އިތުބާރު އޮންނަންޖެހޭ ފަރާތްތަކެއް ކަމަށްވާން ޖެހޭ ކަމަށް ޖެންޑާ މިނިސްޓްރީން ބުންޏެވެ.
އެ މަގާމު ހިޝާނަށް ދިނީ މިދިޔަ ޑިސެމްބަރު މަހުގެ ތިންވަނަ ދުވަހު ބޭއްވި، ނުކުޅެދުންތެރިކަން ހުންނަ މީހުންގެ ދުވަސް ފާހަގަކުރުމުގެ ރަސްމިއްޔާތުގައެވެ.
އޭނާއާ ގުޅޭ ގިނަ ޝަކުވާތަކެއް މިފަހުން ވަނީ ސޯޝަލް މީޑިއާގައި އާންމުވެފައެވެ. ފުލުހުން ދަނީ ހިޝާންއާ ގުޅޭ މައްސަލައެއް ތަހުގީގު ވެސް ކުރަމުންނެވެ.
