އެންމެ ވަރުގަދަ 100 މަންޒިލްގެ ތެރޭގައި ދިވެހިރާއްޖެ
އެމެރިކާގެ ޓައިމްސް މެގަޒިންއިން ހޮވަމުން އަންނަ ދުނިޔޭގެ އެންމެ ވަރުގަދަ މަންޒިލްތަކުގެ ލިސްޓްގައި ދިވެހިރާއްޖެ ހިމެނިއްޖެއެވެ.
"ވޯލްޑް ގްރޭޓެސްޓް ޕްލޭސަސް"ގެ ނަމުގައި ކޮންމެ އަހަރަކު ނެރެމުން އަންނަ މި ލިސްޓްގައި މި އަހަރު ވަނީ ޤައުމުތަކުގެ އިތުރުން، ސިޓީތަކާއި އަވަށްތަކާއި ސަރަހައްދުތައް ވެސް ހިމަނައިފައެވެ. ޓައިމްސްއިން ބުނެފައި ވަނީ މި ލިސްޓްގައި ހިމަނައިފައިވާ ހުރިހާ މަންޒިލަކީ ވެސް ކޮވިޑް-19 ހާލަތާ ގުޅިގެން ޓޫރިޒަމް ޚިދުމަތްތައް ދިނުމަށް އެހެން ގޮތްގޮތް ހޯދައި ތަފާތު ޚިދުމަތްތައް ދީފައިވާ ޤައުމުތައް ކަަމަށެވެ.
ވަކި ތަރުތީބެއް ނެތް މި ލިސްޓުގައި ބުނެފައި ވަނީ ލިސްޓްކޮށްފައިވާ ހުރިހާ ޤައުމަކުން ވެސް ހިތް ދަމައިގަންނަ ފަދަ ގޮތަކަށް ކޮވިޑް-19 ހާލަތުގައި ފަތުރުވެރިންނަށް ޚިދުމަތްތައް ދީފައިވާ ޤައުމުތައް ކަަމަށެވެ.
މިގޮތުން ރާއްޖެއާ ބެހޭ ގޮތުން ބުނެފައި ވަނީ ރާއްޖެއަކީ، ރާއްޖެއަކީ ވެކްސިން ފުރިހަމަ ކުރި ފަތުރުވެރިންނަށް ކަރަންޓީނުވާން ނުޖެހޭ ގޮތަށް ދަތުރު ކުރުމުގެ ފުރުސަތު ހުޅުވައިލި ޤައުމުގެ ގޮތުގައެވެ. އަދި ރާއްޖެ އަންނަ ފަތުރުވެރިންނަށް ވެކްސިން ފުރިހަމަ ކުރެވޭނެ ގޮތް ހެދުމުގެ މަސައްކަތް ކުރުމަށް ނިންމައިފައިވާ ނިންމުމަށް ވެސް ޓައިމްސްއިން ވަނީ މަރުޙަބާ ކިޔައިފައެވެ. މީގެ އިތުރުން ރާއްޖޭގައި ދާދި ފަހުން ހުޅުވި ފަރި އައިލެންޑްސްއާއި ވެލާ ޕްރައިވެޓް އައިލެންޑުގެ ވާހަކަ ހިމަނައިފައިވެއެވެ. ހަމަ އެހެންމެ އަންނަ އަހަރު ރާއްޖޭގައި ތަރައްގީކުރަން ފަށާ ފްލޯޓިން ސިޓީގެ ވާހަކަ ވެސް އޮތެވެ.
މި ލިސްޓުގައި ރާއްޖޭގެ އިތުރުން ބެންކޮކާއި ކޮސްޓަރީކާ، ދުބާއީ، މެޑްރިޑް ނިއުޔޯކް ސިޓީ، ޕެރިސް، ސިންގަޕޫރު ފަދަ މަޝްހޫރު މަންޒިލްތައް ހިމެނެއެވެ.
