ސުކޫލު ހުޅުވެން މަދު ދުވަސްކޮޅަކަށް ވީއިރު ވެސް ފޮތްތައް ހަމަނުވެ ބެލެނިވެރިންގެ ޝަކުވާ ބޮޑުވެއްޖެ!
ދިރާސީ އައު އަހަރުގެ ކިޔެވުން ފެށެން މަދު ދުވަސްކޮޅަކަށް ވީއިރު ވެސް ގިނަ ގުރޭޑްތަކުގެ ފޮތްތައް ހަމަ ނުވެގެން ބެލެނިވެރިންގެ ޝަކުވާ ބޮޑުވެއްޖެއެވެ.
މި މަހު 10 ވަނަ ދުވަހު (އަންގާރަ) ސުކޫލުތައް ހުޅުވޭއިރު ގިނަ ގުރޭޑްތަކެއްގެ އިސްލާމް އަދި ދިވެހި ފޮތް ލިބިފައެއް ނުވެއެވެ. މީގެ އިތުރުން ވެސް ބައެއް ސުކޫލުތަކަށް ގުރޭޑް 7ގެ ހިސާބު ފޮތް ވެސް ނުލިބޭކަމަށް "ދެން"އަށް ވަނީ މައުލޫމާތު ލިބިފައެވެ.
އާއްމު ގޮތެއްގައި އެހެން އަހަރުތަކުގައި ދިރާސީ އަހަރު ނިމި ހަފްތާއެއް ނުވަތަ ދެ ހަފްތާ ތެރޭގައި ހުރިހާ ފޮތްތައް ލިބުނު ނަމަވެސް މިއަހަރު ފޮތްތައް ނުލިބި ލަސްވެފައިވާއިރު އަދި ފޮތްތައް ލިބޭނެ ދުވަހެއް ވެސް ނޭނގޭކަމަށް މައުލޫމާތު ލިބެއެވެ.
މިހައިތަނަށް އައިއިރު ވެސް ފޮތްތައް ހަމަނުވުމަކީ ދަތިވާނެ ކަމަކަށް ވާނެތީއާއި ފޮތްތައް ލިބޭނެ ދުވަހެއް ނޭނގުމަކީ ބެލެނިވެރިންް ކަންބޮޑުވުމާ އެކު ކުރާ ޝަކުވާއެކެވެ. އަދި ލަހުން ، ފޮތް ލިބުމުގެ ސަބަބުން ކިޔެވުމަށް ދަތިވެދާނެކަމަށް ބުނެ ބައެއް ބެލެނިވެރިން ދަނީ ޝަކުވާ ކުރަމުންނެވެ.
މިކަމާ ބެހޭ ގޮތުން އެޑިޔުކޭޝަން މިިނިސްޓްރީގެ ބަހެއް ހޯދާލުމަށް "ދެން" އިން ގުޅައިލުމުން ވިދާޅުވީ ސުކޫލު ހުޅުވުމުގެ ތައްޔާރީތަކާ ބެހޭގޮތުން މިނިސްޓްރީން ނޫސްވެރިންގެ ބައްދަލުވުމެއް ބާއްވާނެކަމަށެވެ.
އަންނަ އާދިއްތަ ދުވަހު ދިރާސީ އައު އަހަރު ފެށޭއިރު ދަރިވަރުން ސުކޫލަށް ގެންގޮސްގެން ކިޔަވަދިނުމަށް ނިންމައވައިފައިވާކަމަށް އެޑިޔުކޭޝަން މިނިސްޓްރީން ވަނީ ވިދާޅުވެފައެވެ. އަދި ސުކޫލުތަކަށް ވަދެވޭނީ ވެކްސިނުގެ ދެ ޑޯޒް ޖަހައި ވެކްސިން ފުރިހަމަކޮށްފައިވާ ފަރާތްތަކަށް އެކަނި ކަމަށް ވެސް އެޑިއުކޭޝަން މިނިސްޓްރީން ވަނީ ވިދާޅުވެފައެވެ. ،ވެކްސިން ޖަހައިގެން ސްކޫލްތަކަށް ވަންނަން ހުއްދަ ދެވޭ ފަރާތްތަކުގެ ތެރޭގައި ހިމެނެނީ، ދިވެހިރާއްޖޭގައި ހިންގާ ކޮވިޑް19 ވެކްސިން ޕްރޮގްރާމްގެ ތެރެއިން ވެކްސިން ޖެހޭ އުމުރުފުރައިގެ ފަރާތްތައް އެކަންޏެވެ. އަދި ދަރިވަރުން މި ކެޓެގެރީން އިސްތިސްނާވާނެ ކަމަށް ވެސް އެ މިނިސްޓްރީން ވަނީ ހާމަކޮށްފައެވެ.
