ޕްރައިމަރީގެ ވޯޓުލުން ކުރިއަށްދާއިރު، ޕްރައިމަރީގައި 1،146 މީހުން ވާދަކުރެއެވެ. ޕްރައިމަރީ ބާއްވަނީ ޖުމްލަ 62 މަގާމަށް ކަމަށް ޕީޕީއެމުން ބުނެއެވެ.
މި ޕްރައިމަރީގައި ޖުމްލަ 134 ވޯޓު ފޮށި ބެހެއްޓުމަށް ހަމަޖެހިފައިވާއިރު، ހަތަރު ސިޓީގެ ތެރެއިން ޕްރައިމަރީ އޮންނާނީ ދެ ސިޓީގައެވެ. އެއީ ފުވައްމުލަކާއި ކުޅުދުއްފުށި ސިޓީގައެވެ.
ޕީޕީއެމްގެ ޕްރައިމަރީ ފަށާފައިވާއިރު، ސަރުކާރު ކޯލިޝަނުގައި ހިމެނޭ އެންމެ ބޮޑު ޕާޓީ ކަމަށްވާ އެމްޑީޕީން ވަނީ މިދިޔަ ހުކުރު ދުވަހު އެ ޕާޓީގެ ޕްރައިމަރީ ބާއްވާފައެވެ.
މީގެއިތުރުން ޖުމްހޫރީ ޕާޓީންވެސް ޕްރައިމަރީ ބޭއްވުމަށް ނިންމާފައިވާއިރު، އެ ޕާޓީގެ ޕްރައިމަރީ ބޭއްވުމަށް ހަމަޖެހިފައިވަނީ މިމަހު 12 ގައެވެ.
ކައުންސިލް އިންތިހާބު އޮންނާނީ އަންނަ އޭޕްރީލް މަހުގެ ހަތަރުވަނަ ދުވަހުއެވެ.
