އޮޅުވައިލައިގެން ލައިސަންސް ހޯދަން އުޅުނު މީހަކު 28،000 ރުފިޔާއިން ޖޫރިމަނާ ކޮށްފި
އޮޅުވައިލައިގެން އެއްގަމު އިންޖީނުލީ އުޅަނދު ދުއްވުމުގެ ލައިސަންސެއް ހޯދަން އުޅުނު މީހަކު 28،000 ރުފިޔާއިން ޖޫރިމަނާ ކުރަން ހައި ކޯޓުން ހުކުމްކޮށްފިއެވެ.
މ. މުލަކު މީހެއްގެ މައްޗަށް ދައުލަތުން ދައުވާ އުފުލީ އޭނާގެ އާއިލާގެ މީހަކަށް މ. އަތޮޅު ކައުންސިލްގެ އިދާރާއިން ދޫކުރި ލައިސަންސެއްގެ މައުލޫމާތު އޭނާގެ ނަމަށް ބަދަލު ކުރުމަށް ފަހު ލައިސަންސް އައު ކުރަން ފޯމު ހުށަހެޅުމުންނެވެ. އެމީހާގެ މައްޗަށް އުފުލައިފައި ވަނީ އެނގި ހުރެ، ސައްހަ ނޫން ގޮތުގައި ލިޔުމަކަށް ބަދަލު ގެނައުމުގެ ދައުވާއެވެ.
އެ މީހާގެ މައްޗަށް ދައުވާ ކުރުމުން ދަށު ކޯޓުގައި އޭނާ ވަނީ ދައުވާއަށް އިއުތިރާފުވެފައެވެ. އެހެންކަމުން އެ ކޯޓުން ހުކުމް ކުރީ 74،000 ރުފިޔާއިން އޭނާ ޖޫރިމަނާ ކުރުމަށެވެ.
ނަމަވެސް އެ އަދަބާ މެދު ހިތްހަމަ ނުޖެހޭތީ އޭނާގެ ފަރާތުން އެ މައްސަލަ އިސްތިއުނާފު ކުރުމުން ހައި ކޯޓުން މިދިޔަ ބުރާސްފަތި ދުވަހު ކުރި ހުކުމުގައި ވަނީ ދަށު ކޯޓުގައި އޭނާ ދައުވާއަށް އިއުތިރާފުވެފައިވާތީ ގާނޫނުލްއުގޫބާތުގެ ދަށުން އަދަބު ކަނޑައެޅުމުގެ އަސާސީ މިންގަނޑުން އެއް ދަރަޖަ ދަށްކުރަން ޖެހޭ ކަމަށެވެ.
މީގެ އިތުރުން ކުށަކާ މެދު ދެރަވާ ކަން އާންމުކޮށް ފާޅުކޮށްފި ނަމަ، އަދަބުގެ ދަރަޖަ ދަށް ކުރަންޖެހޭ ކަމަށާއި އެކަމަކު އާންމުކޮށް މާފަށް އެދުމާ ބެހޭ އުސޫލެއް އޭރު ނެތުމުން އެ ފުރުސަތު އޭނާއަށް ލިބިފައިނުވާ ކަމަށް ވެސް ހައި ކޯޓުގެ ހުކުމުގައިވެއެވެ. އަދި އުސޫލު ހަދަންޖެހޭ ފަރާތުން އުސޫލެއް ނަހަދާ އޮތުމަކީ އޭނާއަށް ލިބެންޖެހޭ ހައްގަކުން މަހްރޫމު ކުރެވޭނެ ސަބަބެއް ނޫން ކަމަށާއި އެހެންވެ، އޭނާއަށް އެ ހައްގު ދޭންޖެހޭނެ ކަމަށް ފަނޑިޔާރު އަލީ ސަމީރު ރިޔާސަތު ބެލެހެއްޓެވި ބެންޗުން އިއްވެވި އެ ހުކުމުގައިވެއެވެ.
