ރޯދައަށް 51 ބާވަތެއްގެ މުދާ އަގުހެޔޮކުރަނީ
ރޯދަ މަހު ބައެއް ތަކެތީގެ އަގު ބޮޑުވާތީ، 51 ބާވަތެއްގެ އަގު ހެޔޮ ކުރުމުގެ ވިސްނުން ގެންގުޅުއްވާ ކަމަށް އިކޮނޮމިކް މިނިސްޓްރީން ބުނެފި އެވެ.
ފޮރިން އިންވެސްޓްމަންޓްތަކާ ބެހޭ މައުލޫމާތު ދިނުމަށް އިކޮނޮމިކް މިނިސްޓްރީއިން އިއްޔެ ބޭއްވި ބްރީފިންގައި މިނިސްޓަރު ފައްޔާޒް ވިދާޅުވީ 51 ބާވަތެއްގެ މުދާ އަގުހެޔޮކުރުމުގެ ގޮތުން ސަރުކާރުން މާކެޓަށް "އިންޓަވީން"ކުރާނެ ކަމަށެވެ. އަދި އެބާވަތުގެ މުދާ ދުރާލާ ގަނެގެން ގެނެސް، ސްޓޮކްކުރުމަށްޓަކައި ކުރަން ޖެހޭ ކަންތައްތައް ކުރަމުން އަންނަ ކަމަށް މިނިސްޓަރު ވިދާޅުވި އެވެ.
"އަޅުގަނޑުމެން މަސައްކަތް މި ކުރަނީ އަސާސީ އައިޓަމްތައް އަގު ހެޔޮ ކުރަން އެސްޓީއޯ ނޫނީ ސަރުކާރު ކުންފުންޏެއް ބޭނުންކޮށްގެން ސަޕްލައި އިތުރު ކުރަން މި މަސައްކަތް ކުރަނީ. އެވެސް ކޮންމެހެނެއް ވަކި އަގެއްއި ވިއްކާނީ މިހެން ކަނޑައެޅުމުގެ ބަދަލުގައި މާކެޓަށް އިތުރު ކުރާނީ. އެހެންވުމުން އޭގެޒާތުގައި ޑިމާންޑް އެންޑް ސަޕްލައި އަށް ބަލާ އަގު ހެޔޮވާނެ،" ފައްޔާޒު ވިދާޅުވި އެވެ.
މިނިސްޓަރު ވިދާޅުވީ އާންމުންގެ ވިޔަފާރިތަކަށް ވަދެ ކޮންޓްރޯލް ކުރުމުގެ ވިސްނުމެއް ސަރުކާރުން ނުގެންގުޅޭ ކަމަށެވެ. އެހެން ނަމަވެސް އަސާސީ ބާވަތްތަކުގެ މުދާ އަގުހެޔޮކުރުމުގެ ގޮތުން އެސްޓީއޯ މެދުވެރިކޮށް ސަޕްލައި އިތުރުކުރުމަށް މަސައްކަތްކުރާނެކަމަށް އޭނާ ވިދާޅުވި އެެވެ.
މިދިޔަ އަހަރު ރޯދަމަހު ބާޒާރުގައި އެންމެ އަގު އުފުލުނު އެއް ބާވަތަކީ ކަނޑޫދޫ މިރުހެވެ. އެގޮތުން ކަނޑޫދޫ މިރުސް ކިލޯއެއް 1200 ރުފިޔާއަށްވެސް އޭރު ވިއްކި އެެވެ.
