މޫނުމަތިން ފެނުނީ ކުޑަކުޑަ ބަދަލެއް، އަހަރެއް ފަހުން ވީ މަރު
އުމުރުން އެންމެ 6 އަހަރުގެ އެކޭޝާ ސާރިޖް ހިލްގެ މޫނުމަތިން ތަފާތު ކަމެއް ފެނުނީ އާއިލާއާ އެކު ކެއުމަކަށް އިންސާފުކުރަން ތިއްބައެވެ. އޭގެ ފަހުން ސެޕްޓެމްބަރު 2020ގައި ސްކޭންއަކުން ދެއްކީ ވަރަށް މަދުން ނޫނީ ނުފެންނަ ވައްތަރެއްގެ ޓިއުމަރެއް އެކޭޝާގެ ސިކުނޑީގައި އުފެދިފައިވާ ކަމަށެވެ.
އެކޭޝާގެ 32 އަހަރުގެ މަންމައާއި 26 އަހަރުގެ ޒުވާން ދޮން ބައްޕަ އަދި 9 އަހަރުގެ ބޭބެއަށް މި ޚަބަރާ އެކު ބޮޑު ޝޮކެއް ލިބުނެވެ. އޭރު އެކޭޝާގެ މަންމަ ކާލީ ސާރިޖް ބަނޑުބޮޑެވެ. މިދިޔަ ޖެނުއަރީ މަހު ކާލީ ވިހިއިރު އެކޭޝާ ދިޔައީ މަރާ ހަނގުރާމަ ކުރަމުންނެވެ. އެކޭޝާ މަރުވީ މިދިޔަ ނޮވެމްބަރު މަހުގެ 28ވަނަ ދުވަހުއެވެ.
އާއިލާއިން ބުނާ ގޮތުގައި ކަމެއް ގޯސްވާކަން އެނގުނީ އަކޭޝާގެ މޫނުމަތިން ތަފާތެއް ފެނިގެންނެވެ. އެގޮތުން އެއް ލޮލުގެ ކަޅި ވަރަށް ބޮޑަށް އައިބުވާން ފެށިކަމަށް އާއިލާއިން ބުންޏެވެ. އަދި އަނގައިގެ އެއްފަޅިއަށް ވެސް ބަދަލުތަކެއް އަންނަން ފެށިކަމަށް ވެއެވެ. އޭގެ ކުޑަ ދުވަސްކޮޅެއް ފަހުން މިބަދަލު މާ ބޮޑަށް ފާހަގަވާން ފެށުމުން ޑޮކްޓަރަށް ދެއްކިއެވެ. އެހާ ހިސާބުން ސިކުނޑީގައި ޓިއުމަރެއް އުފެދިފައިވާކަން ދެނެގަނެވުނެވެ،
އިތުރު ޓެސްޓުތަކެއް ހެދުމުން މިއީ ވަރަށް މަދުން ނޫނީ ނުފެންނަ ބާވަތެއްގެ ކެންސަރެއްކަން އެނގުނެވެ. މިއީ ފަރުވާއެއް ވެސް ހޯދިފައި ނުވާ ކެންސަރެކެވެ. އެހެންވެ ޑޮކްޓަރުންނަށް ޖެހުނީ ޓިއުމަރު އިތުރަށް އުފެދުނަ ނުދިނުމަށް ރޭޑީއޯތެރަޕީ ދޭށެވެ. ޑޮކްޓަރުން އޭރު ބުނިގޮތުގައި އެކޭޝާއަށް ދިރިހުރުމުގެ އުއްމީދު އޮތީ އެންމެ ގިނަވެގެން އެއް އަހަރުދުވަހުގެ މުއްދަތަކަށެވެ.
އޭގެ ފަހުން އެކޭޝާއަށް ދިރިއުޅުމުގެ ފުރުސަތު ލިބުނީ 15 މަސްދުވަހުގެ މުއްދަތަކަށެވެ. އެހެން ނަމަވެސް އޭގެ ބޮޑުބައެއް ހޭދަކުރަން ޖެހުނީ އެނދުމަތީގައެވެ. ހަށިގަނޑުގެ ގިނަ ގުނަވަންތައް ވަނީ ޕެރެލައިޒް ވެފައެވެ. އާއިލާއިން މަސައްކަތްކުރީ އެނދުގައި އޮންނަން ޖެހުނަސް އެކޭޝާއަށް ދިރިއުޅެވޭތޯއެވެ. އެހެންވެ އާއިލާގެ ހުރިހާ މެމްބަރުން އެކޭޝާއަށް ވަގުތު ދިނެވެ. އާއިލާއިން ބުނީ އެންމެ ފަހު ވަގުތާ ޖެހެންދެން ވެސް އެކޭޝާ ހިތްވަރު ކުރިކަމަށެވެ. ފަހު މަސް ދުވަހު މުޅިންހެން ވާހަކަ ނުދެއްކި ގިނަ ވަގުތު ލޯމަރައިލައި އޮންނަން ޖެހިފައި އޮތުމާ ހަމައަށެވެ.
އަބަދުހެން ކުޅިވަރު ކުޅުމާއި އެހެން ވެސް ކަންކަމުގައި ހެލިފެލިވެ އުޅުނު އެކޭޝާ ކެންސަރު ޖެހިފައި ހުރިކަން އެއްވެސް މީހަކަށް ދެނެ ނުގަނެވުނެވެ. ތިންވަނަ ސްޓޭޖަށް ދާންދެން ބޭރުފުށުން ބޮޑު ބަދަލެއް ވެސް ނުފެނެއެވެ. އާއިލާއިން ބުނީ ކެންސަރު ފަދަ ބޮޑު ބައްޔެއް އެކޭޝާއަށް ޖެހިދާނެކަމަށް ހީވެސް ނުކުރެވުނު ކަމަށެވެ. އެހެން ނަމަވެސް ސްނޯ މޫސުމުގައި އެކޭޝާ ވަކިވެ ދިޔައީ، ދެން ސްނޯ ވެހޭ ކޮންމެ ފަހަރަކު އާއިލާއަށް އެކޭޝާގެ މަންޒަރު ސިފަކޮށްދޭނެ ހަނދާންތަކާ އެކުއެވެ.
