ކޯޓްނީއާއި ކްލޯއީ ވެސް ލާ ހެދުން ޝެއާ ކުރޭ
އެމެރިކާގެ ބިލިއަނަރު އާއިލާއަށް ނިސްބަތްވާ ކޯޓްނީ ކާޑޭޝަންއާއި ކްލޯއީ ކާޑޭޝަން ވެސް އެކަކު އަނެކަކު ލާ ހެދުން ޝެއާ ކުރާކަން ހާމަވެއްޖެއެވެ.
މިދިޔަ އަހަރު ޓަހީޓީގައި ފާހަގަކުރި ކިމް ކާޑޭޝަންގެ އުފަން ދުވަހު ކޯޓްނީ ވަނީ ސީ ތްރޫ މެޓާލިކް ކުރު ހެދުންކޮޅެއް ލައިފައެވެ. ރޭގަނޑުގެ ޕާޓީއަކަށް ލީ އެހެދުމުގައި ގިނަ ބައެއްގެ ލޯތައް އަޅައިގަތެވެ. މީޑީއާގެ ސަމާލުކަން ވެސް އެ ހެދުމަށް ހުއްޓުނެވެ.
އޭގެ ފަހުން ކްލޯއީ ވަނީ ހަމަ މިހެދުމުގައި ފޮޓޯތަކެއް ނަގައި އިންސްޓަގްރާމަށް އަޕްލޯޑުކޮށްފައެވެ. ދާދި ފަހުން އަޕްލޯޑުކުރި މި ފޮޓޯގައި ކްލޯއީ ތައްޔާރުވެގެން ހުރީ ޕީޕަލްސް ޗޮއިސް އެވޯޑު ހަފްލާއަށް ދާށެވެ.
ދެ ހަފްލާއަކަށް ކްލޯއީއާއި ކޯޓްނީ އެއް ހެދުމެއް ލުމުން އެއްބައެއްގެ ފާޑުކިޔުން ވަރަށް ބޮޑަށް އަމާޒުވެފައިވާއިރު އަނެއް ބަޔަކު ދަނީ އެކަމަށް ތައުރީފު ކުރަމުންނެވެ. އާންމުކޮށް ވެސް ދެބެއިން އެކަކު އަނެކަކާ އަންނައުނު ޝެއާ ކުރެއެވެ. މި ގުޅުން ކްލޯއީއާއި ކާޑޭޝަންގެ ފަރާތުން ފެނުމުން އެއްބަޔަކު ދަނީ ތައުރީފު ކުރަމުންނެވެ.
ޕީޕަލްސް ޗޮއިސް އެވޯޑު ފަދަ ބޮޑު ހަފްލާއަކަށް މަޝްހޫރު ފެޝަން ޑީވާއެއް އަދި ބިލިއަނަރެއް އެއް ފަހަރު، އެހެން މީހަކު ލައިފައިވާ ހެދުމެއް ލާފައިވާތީ އެއްބަޔަކު ދަނީ ފާޑުކިޔަމުންނެވެ.
މިއަހަރުގެ ޕީޕަލްސް ޗޮއިސް އެވޯޑު ވެގެން ގޮސްފައި ވަނީ ކާޑޭޝަން އާއިލާއަށް ކާމިޔާބު އެވޯޑަކަށެވެ. އެގޮތުން އެންމެ މޮޅު ރިއާލިޓީ ޝޯ "ކީޕިން އަޕް ވިތު ތަ ކާޑޭޝަންސް"އަށް ލިބުނުއިރު ރިއަލިޓީ ޝޯގެ އެންމެ މޮޅު ތަރިއެއްގެ އެވޯޑު ލިބުނީ ކްލޯއީއަށެވެ.
